Ministerit 32-t Ilulissani aqagu ataatsimiissapput

Taamaaliortoqarsimanngilarli, massakkullu Kuupik Kleistip Connie Hedegaard ajornartorsiut pillugu aqagu ullaap tungaani ataatsimeeqatigissavaa.

Kalaallit Nunaat EU-mut ilaasortaanngikkaluarluni EU-mi inatsisit malillugit nunat EU-p avataaniittutut allatulli akeqanngitsumik CO2 kvotenik pissarsiniarluni piffissaagallartillugu periarfissaqarsiamgaluarpoq. Taamaasiortoqarsimanngimmalli nunarput siunissami akisunaarlugit CO2 kvotenik niiverniartartussaassaaq, ingammik aatsitassanik uuliamillu piiaasoqartussaatillugu.

Connie Hedegaar ualeq Ilulissanut tikittoq aperaarput sooq Nunarput CO2 kvotissaanik qinnuteqassunneqarsimannginnersoq.

- Naluara sooq taamaannersoq, aqagu Kuupik Kleist oqaloqatigisussaavara sivisuumik sukumiisumillu qularnanngitsumillu qaammatini tulliuttuni Kalaallit Nunaata unamminartumik atugassai qanoq iliuuseqarfigissanerlutigit eqqartussavarput, Connie Hedegaard oqarpoq.

Danmarki CO2 kvotenik ukiumut 2,2 million tonsinik aniatitsisinnaanissamut akeqanngitsumik tunineqarsimavoq, Nordsømi oliemik gasimillu piiaaneq matussuserniarlugu.

Taamaammat takorlooruminartorujussuuvoq Danmarkip CO2 kvotet Nunatta pisariaqartiligassai tunniussinnaanavianngikkai. Alcoami piviusunngussappat 612.000 tonsit CO2 kvotet ukiumut pisariaqartissavagut uuliasiussaguttalu millionit marlussuit pisariaqartissallutigit.

Taamaammat Conny Hedegaard aperaarput Danmarkip Nunatsinnut CO2 kvotenik tunniussinissaa piviusorsiortuunersoq?

- Aaqqiinissamut arlalinnik periarfissaqarpoq, kisianni KNR aqqutigalugu isumaqatiginninniarnianngilanga, massakkut naalakkersuisut siulittaasuat oqaloqatigissavara, torersumik eqqissisimasumillu pisarnitsitut oqaloqatigiissaagut. Qularutiginngilaralu ukiap ingerlanerani aaqqiisinnaassalluta, Kalaallit Nunaat Danmarkiluunniit aallaavigigaluaraanni tamanut naammaginartumik, Silap pissusaanut ministeri Connie Hedegaard radioaviisimut oqarpoq.

Silap pissusaa pillugu oqaloqatigiinneq nunarsuatsinni ministerinit 32-nit peqataaffigineqartoq aqagu nalunaaqutaq ataatsimut Ilulissani aallartissaaq.