Ministeri: Danmarkip Kalaallit Nunaanni pineqaatissiisarnerup sivisunerulernissaa taperserpaa
Kalaallit Nunaata kissaatigippagu peqqarniitsumik pinerluuteqarsimasut sakkortunerusumik pineqaatissinneqartalernissaat, Danmarkip tamanna tapersersorusuppaa.
Inatsiseqarnermut ministerip Peter Hummelgaardip KNR-imit apersorneqarami tamanna oqaatigaa.
- Tamanna tunngaviusumik aporfissaqartinngilarput, ministeri oqarpoq.
Naalakkersuisunit kissaatigineqartut malillugit inatsiseqarnermut ministeritut akisussaaffimi ataaniittut, ineriartortinneqarnissaannik pisariaqartinneqartut pimoorullugu tusaaneqartut oqaatigaa.
- Nuummi ataatsimiinnerni najuuffigisanni kissaat saqqummiunneqartoq peqqarniitsumik pinerluuteqarsimasut sakkortunerusumik pineqaatissinneqartalernissaat soorunami sukumiisumik misissorneqassaaq, Peter Hummelgaard oqarpoq.
Naalakkersuisut kissaataat
Kalaallit Nunaanni pinerlunneq pillugu inatsimmi pineqaatissiineq ukiunut qulinut annerpaaffilerneqarnikuuvoq. Naalakkersuisunit 2019-imili kissaatigineqartutut oqaatigineqartalerpoq, pineqaatissiinermut killigititaasup ukiuni quliniit ukiunut 16-inut annertusineqarnissaa.
Ukiunilu kingullerni qanoriliuuseqarfigineqanngimmat Naalakkersuisut Danmarkimi inatsiseqarnermut ministereqarfik allakkatigut apriilimi avoqqaaraat.
Danmarkip Naalakkersuisuinit Kalaallit Nunaata inatsisinut atortinneqarfiisa qanoriliuuseqarfiginisaat tulleriissaarinermi kingulliunneqartut tassani oqaatigineqarpoq, naak tamanna arlaleriarluni kissaatigineqartaraluartoq.
Peter Hummelgaardilli oqaatigaa Kalaallit pinerlunneq pillugu inatsisaat qanittukkut nutarterneqassasoq, tamannalu ilutigalugu pinerluuteqarsimasut sakkortunerusumik pineqaatissinneqartalernissaannut periarfissat misissorneqarumaartut.
- Københavnimut uteriutaa tamanna misissussavara, Danmarkip inatsiseqarnermut ministeria oqarpoq.
