Minik Dahl Høegh assammik arsarnermi Sverigemi ingerlalluarpoq
36-nik ukiullip Minik Dahl Høeghp AMO HK-mut isumaqatigiissutini ukiup unammiffiusup tulliup naammassinissaanut sivitsorpaa.
Peqatigiiffillu aasap kingorna kalaalersarilikkaminik iluarisimaarinninnissamut pissutissaqarluarpoq.
AMO HK pikkorinnerni tullerni unammisartuusoq pokalinnanniunnermi tupaallatsitsitsivoq pingasunngormallu unnukkut siorna pokalinnanniunnermi finalertut Skövde kvartfinalemi 40-39-mik ajugaaffigalugit.
- Skövdemut unamminitsinni kingullerni marlunni assut arsarluarpunga. Unamminermi siuliani quleraareerlunga pingasunngormat unnukkut aqqaneq marloraarpunga, Minik Dahl Høegh oqarpoq.
Qasuersaarnissamut piffissaqanngilaq
Unamminermi isertitat katillutik 79-usut takutippaat unammineq tamakkivillugu tamaviaartoqartoq qasuersaalaarnissamut piffissaqarfiunngitsumik.
- Allaat qujamasungajappunga minutsinni marlunni anisitaagama, Minik Dahl Høegh illarpoq.
- Unammisavut angisuujupput, nukittuut, sukkasuut qasujaatsullu. Unammineq naammasisoq nalunaarlugu dommeri siggarmat seeqquinnarpunga. Timiga nukissaarutiivippoq, Minik Dahl Høegh oqarpoq.
Maanna decemberimi semifinalemi unamminerit sakkortuut marluk aqqusaartussanngorpaat sulili kikkut unammissanerat makitsissutaanani.
Pokalinnanniunnerli qanorluunniit naammassigaluarpat AMO HKp Minik Dahl Høeghp isaatitsisuunera naammagisimaarluarpaa. AMO HK ullumi nalunaarpoq Minik Dahl Høegh-mut isumaqatigiissut 2023-p tungaanut sivitsorneqartoq.
Anguniagaq anguaat
Peqatigiiffiup aamma Minik Dahl Høeghp peqatigiiffiup maanna killiffia naammagisimaarpaat pikkorinnerit tulliini siartuugamik aammalu pokalinnanniunnermi semifinalemut anngullutik.
- Anguniagarput anguarput. Semifinalemi ajorsassagatinneqarpugut taamaattorli ligami unammisartut unammigaangatsigit arsarluartarpugut. Semifinalemut assut qilanaarpugut, Minik Dahl Høegh naggasiivoq.
