Minik Dahl Høegh arsaqqissinnaalerpoq

Kalaaleq assammik arsartartoq Minik Dahl Høegh, ajoqusersimanini pillugu sivisuumik arsarsimanngeriarluni Skanderborg Håndboldimi arsartartoqatinilu ippassaq unammineranni peqataaqqilerpoq.
Assi © : KNR
Allattoq Jonas Fievé
februaarip 11-at 2018 13:54

Ajoqusersimanini pillugu ukiup affaani arsarsimanngilaq, Skanderborgilli Ribe/Esbjergimut unamminerani ippassaq peqataavoq. Minik Dahl Høegh internetikkut attaveqaqatigiittarfikkut Instagramikkut nammineq taama allaaserisaqarpoq.

- Skanderborgip tujuuluaraa ippassaq ateqqissinnaanngorpara. Arsaqqilerluni nuanneqaaq. Unammeqataasinnaanissara qilanaaraara, Minik Dahl Høegh allappoq.

Naak Skanderborgip Ribe/Esbjergimut unamminerani ataatsimik isertitaqaraluarluni, Skanderborg Håndboldip arsartarfimmini 31-34-mik ajorsarpoq.

Aviisip Århus Stiftstidendep allaaserisaa naapertorlugu Skanderborgimiut unammilluaraluarput, Ribe/Esbjergimiulli unamminerup immikkoortuata aappaata aallartinnerani arfinileriarlutik tulleriissiinnarlugit isertitsimmata Skanderborg Håndbold kinguarpoq.

AAMMA ATUARUK Minik Dahl Høegh Skanderborg Håndboldimut nuuttoq

Minik Dahl Høegh, Århus Håndboldimit Skanderborg Håndboldimut ukiup massuma aallartinnerani nuuppoq.

 

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq