RAL Minik aamma Ivalo Arctica angivallaarput
- Tamanna ilungersunarpoq, umiarsuarmik taama angitigisumik nunatta qeqqani qeqertarsuullu tunuani nunaqarfinni assartuisoqassammat, Royal Arctic Linemi Ataqatigiissarisoq Taitsiannguaq Olsen oqarpoq
Royal Arctic Linep umiarsuartaava nunaqarfiliartaat Minik Arctica novemberi 30-anni atserneqarmat Qaqortumi inuppassuarnik peqataaffigineqarluni naliuttorsiutigineqarpoq.
Umiarsuaq Kalaallit Nunaata sineriaani angalasinnaasutut tulluarsagaavoq pilersaarutillu naapertorlugit nunaqarfiit nunatta qeqqaniittut kiffartuunneqartussaallutik.
AAMMA ATUARUK Ivalo Arctica Nunatsinnut ingerlaartoq
Umiarsuaq nunaqarfinnut assartuisartussaq angalasaleqqammiinnartoq ajornartorsiutit takkupput. Nunatsinni nunaqarfiit anginerit ilaannut Kangaamiunut tikimmat ajornartorsiutit takkupput.
Minik Arctic atsinertuvallaarpoq Kangamiuni umiarsualivik tininnganerani ikkappallalertarmat umiarsuaq avalattariaqarpoq, ulinnissatalu tungaanut avalaqqasariaqartarluni.
- Ullaakkut qulit aqqarngup missaanni, ulinnganera apeqqutaatillugu Minik Arctica usingiaaneq aallartittarparput. Ilaatigut Minik Arctica unnukkut tikereersoq aqaguani ullaakkut aatsaat usingiarneqartariaqartarpoq, Kangamiuni Pilersuisumi niuertoq Ulloriaq Christiansen taama oqarpoq.
Minik Arcticap Kangaamiuni usingiarneqarnera ulloq unnuarlu atorneqarput. Umiarsuaatileqatigiiffiup umiarsuit siornatigut atortagai, akunnerit sisamat missiliorlugit usingiarneqartarput.
- Massakkut paasinarsivoq, umiarsuaaraq Minik Arctica nunaqarfiit ilaannut, soorlu Kangaamiuniusut ittunut, angivallaartoq, taamaattummillu usingiaanerit usilersuinerillu piffissaq sivisunerussuaq atorneqartarluni, umiarsuaaqqat talissinnaaneq ajoramik.
Royal Arctic Linemi ataqatgiissaarisoq Taatsiannguaq Olsen taama oqarpoq taassuma nassuerutigaa umiarsuit Minik aamma Ivalo Arctica nunaqarfiit ilaannut talisinnaannginnerat
- Nassuertigissavarput Minik aamma Ivalo Arctica nunaqarfiit ilaannut angallavisartakkatsinnut naleqqutinngimmata , Taatsiannguaq Olsen oqarpoq.
Royal Arctic Line umiarsuarnik nutaanik nunaqarfinnut angalasartussanik nutaanik pisinissani pilersaarusiorlugu aallartereerpaa
- Taamaattumik umiarsuaaqqanik naleqqunnerusunik sanatitsinissarput siunertaralugu, piffissami qaninnepaami pilersaarusiussaagut, Taatsiannguaq Olsen Royal Arctic Line-mi ataqatigiissaarisoq oqarpoq.
Royal Arctic Linep umiarsuaatai nunaqarfinnut assartuisartut pingasut nutaanik marlunnik taarserneqarnissaanik umiarsuaatileqatigiiffik pilersaaruteqarpoq ukiullu naalernerani tamanna nalunaarutigineqarumaartoq Taatsiannguaq Olsenip oqaartigaa.
AAMMA ATUARUK Umiarsuaaraq nutaaq Nunatsinnut ingerlaartoq
