Mingutsitsinnginnissaq neriorsuutigisinnaanngilaat

Immami qillerinermi avatangiisit allanngunnginnissaat Cairn Energyp neriorsuutigisinnaanngilaa, taamaattorli pisinnaasartik tamaat atorlugu avatangiisit innarlerneqanngingajannissaat anguniassagitsik neriorsuipput.

Inatsisitigut aammalu aningaasarsiornikkut Cairnip pisortaataa, Simon Thomsonip neriorsuutigiinnarsinnaavaa, sapinngisartik tamaat atorlugu avatangiisit innarlerneri minnerpaamiitinnissaat anguniassagitsik:

- Qillerinerit aallartitsinnagit periuseraarput, sullivissatta avatangiisiisa misissoqqissaartarneri, qillerinittalu avatangiisinut qanoq sunniussinnaaneri nalilersortarlugit. Nalilersuinerit malillugit siumugaaq takusinnaasarparput qillerinitsinni avatangiisit innarlerneqanngigajatussaasut.

- Avatangiisit innarlerneqannginnissaat tunaartaralugu sulisoqarpugut sumiiffinni aalisartunik suleqatigiinnissinnaasumik, taakku suleqatigiinnermikkut anguniartarpaat avatangiisit innerlerneqanngigajannissaat. Tamannalu uagutsinnut pigaartorujussuuvoq.

Mexicop kangerliumanersuani uuliasiorlutik qillerisut ajutoorujussuarnerisa kingorna, maani Kalaallit Nunaanni inuiaqatigiit oqallisigisorujussuuaat avatangiisitta mingutsinneqannginnissaa pingaaruteqartoq.

Simon Thomson isumaqarpoq Cairn Energyp qillerinissaata pilersaarnera BP-p ajutoorujussuarneranut naleqqersuussinnaanagu.

- Mexicop kangerliaumanersuata imaataa Kalaallit Nunaata imartaanut naleqqersuunneqarsinnaanngilaq, taamaattumik Mexicop kangerliumarngani ajutoorneq oqaaseqarfigerusunngilara, Simon Thomsen oqarpoq.

Taassuma naqissuserpaa immami itisuumi qillerinissat pisussaanngitsut. Taamaattumillu ajutoornermut assigusumik pisoqarsinnaanera annikitsoq.

- Annilaangaginerpaavarput uuliamik nassaannginnissarput. Taamaakkaluartoq sillimaniarneq piumasaqaataasoq annerpaaq malipparput. Pigaarteqaarput avatangiisit sulisuttalu ajoqusinnginnissaat, Simon Thomson naggasiivoq.

Oqartussat misissuisitsinerisa inernerata takutippaa qilleriffissami ammassassuaq kisiartaalluni suffisartoq. Uumasunut allanut avatangiisit innarlerneqarnissaat annikittuaraasoq allaaserineqarpoq.

Uuliamik nassaartoqassappat misiliilluni uuliamik ikuallatsitsisoqartussaavoq, ikuallanneqassallutik nappartat 30.000-it, taakkulu ulluni tallimani ikumasussaassapput.