Mingutsitsinnginnerusumik nukissiuuteqalernissaq siunniuppaat
Nunatsiavummi nunaqarfiit nukissiuutinik pilersorneqarnerat ullumikkut innaallagissiuutit dieselitortut atorlugit ingerlanneqarpoq. Taamatut pilersuineq akitsoraluttuinnarpoq, ikummatissallu nunaqarfinnut angallanneqarnerat ajornaatsuinnaaneq ajorpoq.
Taamaattumik Nunatsiavummi naalakkersuisut nukissiuutinik allanik atuinissaq siunertaralugu annertuumik misissuisitsilerpoq. Misissuinerup immikkoortortaa siulleq naammaseqqammerpoq, tassanilu imeq innaallagiarlu atorlugu taaneqartartut nukissiuuteeqqat kiisalu anorisaatit atorlugit nukissiorneq, siunissami nukissiuutissatut atussallugit pitsaanerpaajusut nalilerneqarput.
Nunatsiavummi naalakkersuisut pilersaarutit ingerlateqqillugit, nunap immikkoortuata sineriaani nunaqarfinni sisamani anorisaatit atorlugit maannakkut misilittaallutik aallartipput. Nunatsiavummi pinngortitami pisuussutinut ministerip Shawn Skinnerip, nunaqarfiit Nain, Makivik, Hopedale kiisalu Cartwright misilittaaffissaatut sapaatip akunnerani kingullermi nalunaarutigaa.
Taakkunani nukissiuutinik pisariaqartitsinerup qanoq isikkoqarnera nalilersorneqassaaq minnerunngitsumillu qaqugukkut suminngaanniillu anorlertarnersoq misissorneqassalluni. Aammattaq tassunga atatillugu anorisaatit assigiinngitsut assigiinngississusaallu misissorneqassapput soorlu aamma anorisaatit atorlugit pilersaarutit nunaqarfinnut ataasiakkaanut qanoq akeqassanersut takuneqarsinnaasasut.
Erngup nukinga atorlugu misissuinerit ilanngullugit, anorisaatit atorlugit nukissiuutit misissorneqarnerat 5 millionit koruunit atorlugit naammassissangatinneqarpoq, aamma misissuinerit paasiniaanerillu ukiunik pingasunik sivisussangatinneqarput.
