Nunanut allanut unammisartut EM-imi peqataasalissasut

Europamili Nunarsuarmilu pissartanngorniunnerit pineqartut pisortatigoortuunngillat, nunallu FIFA-mut ilaasortaanngitsut kattuffiannit ConiFA-mit aaqqissuunneqartarlutik, nunat suli namminiilivittunngorsimanngitsut, assersuutigalugu Kalaallit Nunaat, peqataasinnaallutik.

Kalaallit Nunaanni Arsaattartut Kattuffiata GBU-p tamanna nalunaarutigaa, Nunattalu aappaagu 2017-imit peqataasalersinnaanissaa neriuutigineqarluni.

Nunatta nunanut allanut unammisartui, sapaatip-akunnerata tulliata ingerlanerani, tassa juunip ulluisa 16-ianni, sungiusariaatigalugu Danmarkiliassapput, unammilligassanut nutaanut tassani piareersariartussallutik.

- Unammisartuvut ukioq naallugu piareersimajuasapput, Danmarkimullu sungiusariarsinnaanissarput taamaammat nuannaarutigaarput, nunanut allanut unammisartut sungiusaasui Tekle Ghebrelul Rene Olsenilu taama oqarput.

GBU-llu siulittaasuata John Thorsenip periarfissat nutaat neriulluarfigai:

- Nunatta ConiFA-mut ilaasortaaneratigut siunissami UEFA-mut FIFA-mullu ilaasortanngorsinnaanissamut ineriartuutaassaaq. Nunanut allanut ukiup ingerlanerani unammisarnerit amerlinissaannut suliniut, ConiFA aqqutigalugu isumannaarneqarsinnaavoq, taamaammat ConiFA aqqutissaalluarpoq, John Thorsen oqarpoq.

’Confederation of Independent Football Associations’, Conifa, 2014-imi aallarnerneqartoq nunanik 35-inik ilaasortaqarpoq, Ilaatigut Monaco, Nordcypern, Tibet, Zanzibar aamma Québéc ilaasortaallutik.