Illoqarfiit minnerit nunaqarfiillu Inuunerittamit tapersersorneqarput

- Kalaallit Nunaanni innuttaasut peqqinnerulissapput, peqatigisaanillu 2016 tassaalluni "Meeqqat ukiuat". Taamaammat Inuuneritta Puljemi suliniutinut meeqqat inuusuttullu peqinnerunissaannik siunertaqartut 2016-imi aningaasaliivigineqarnissaat Peqqissutsimut Naalakkersuisoqarfiup ukioq manna pingaartissimavaa. Peqqissutsimut Naalakkersuisoqarfik taama ilaatigut allaaserisaqarpoq.

Aamma atuaruk Nerisassat peqqinnartut immikkut ittumik suliniuteqarfigineqalerput

Kalaallit Nunaanni peqqinnerulernissamut ukioq manna suliniuteqarnermi aningaasaliissutit inuiaqatigiinnut minnerusunut atorneqarnissaat Peqqissutsimut naalakkersuisup Doris Jakobsenip taamaammat pingaartippaa, taamaaliornikkut amerlanerpaat sapinngisamik anguneqarsinnaaniassammata, naalakkersuisoq oqarpoq:

- Nunatsinni innuttaasut peqqinnerulernissaannut tamatta peqataaffigerusutatsinnut sumiiffinni suliniutit pitsaasut amerlasuut ukioq manna aningaasaliiffigisimagatsigit nuannaarutigeqaara. Pingaartumik illoqarfinni nunaqarfinnilu minnerusuni, Doris Jakobsen oqarpoq, nangillunilu:

Aamma atuaruk Doris Jakobsen peqqissutsip siuarsaavigineqarneranut aningaasaliivoq

- Immaqa illoqarfinni anginerniittutulli neqeroorutinik aaqqissuulluagaatigisunik amerlasuunik peqanngikkaluartoq, kattuffinnit namminersortunillu piumassuseqartunit qinnuteqaatit aningaasaliiffigisinnaanerat assut nuannaarutissaavoq, Peqqissutsimut naalakkersuisoq oqarpoq.

Nerisarissaarneq, timersorneq aalakoornartunillu hashimillu pinaveersaartitsineq suliniutini ukioq manna ilaatigut aningaasaliiffigineqarput, suliniutinut 34-nut assigiinngitsunut katillugit 350.000 koruunit aningaasaliissutigineqarlutik.