Mimi Karlsen kinguartitseqqittoqarnera pillugu: Inuusuttut aallaqqaataaniilli peqataasussaagaluarput
Naqqiut: Imminut toqunnissamik pinaveersaartitsinermut periusissiaq kingulleq 2019-imi atorunnaartoq siusinnerusukkut allapparput. Periusissiarli taanna Inuuneritta III-mik taallugu meeqqat inuunerinnerulernissaannut periusissiami najoqqutarineratigut suli atuuppoq. Kisianni imminut toqunnissamik pinaveersaartitsinermut nutaamik immikkut periusissialiortoqassasoq, Inatsisartunit aalajangerneqarpoq. Tamannalu naqqipparput.
Namminersorlutik Oqartussat imminut toqunnissamik pinaveersaartitsinermut periusissiaata kingulliup pisortatigoortumik atorunnaarneraniit ukiut pingasut missaat qaangiussimalerput.
Tassa periusissiaat kingulleq 2019-imi atorunnaarpoq.
Imminullu toqunnissamik suli pinaveersaartitsisoqartoq, peqqissutsimut Mimi Karlsenip (IA) KNR-imut erseqqissaatigaa.
Ikiortariaqarpit?
Imminut toqunnissamik eqqarsaateqaruit kisimiittutulluunniit misigiguit, Tusaanngamut 801180-imut sianerlutit 1899-imulluunniit sms-erlutit saaffiginnissinnaavutit.
Tusaanngamut sianerneq sms-ernerluunniit akeqanngilaq, kinaanerlu taasariaqarani.
Tusaannga pillugu uani paasisaqarnerusinnaavutit.
Tassa Inuuneritta III-mik taallugu meeqqat inuunerinnerulernissaannut periusissiaq najoqqutaralugu taamaaliortoqarpoq, periusissiarlu taanna kommunini suliniuterpaalunni isumaginninnermillu sulialinnit soorlu imminut toqunnissamik eqqarsaatilinnik sullissisunit aamma malinneqarluni.
- Taamaammat periusissiaq atorunnaareeraluartoq Inuuneritta III-mi suli malinneqarpoq, Mimi Karlsen oqarpoq.
Meeqqat inuusuttullu kingusissukkut aatsaat ilanngunneqartut
Ukioq mannali piareerneqartussamik imminut toqunnissamik pinaveersaartitsinermut nutaamik periusissialiortoqassasoq, Inatsisartunit 2020-mi ukiakkut aalajangerneqarpoq
2020-lli kingornagut imminut toqussimasut 90-init ikinnerunngillat. Tamanna Kalaallit Nunaanni Politiit kisitsisaataanni erserpoq - ukioq mannalu imminut toqussimasut taakkununnga ilanngunneqanngillat. Taakkumi qassiunnerannik nalunaarsuinerit suli inaarsarneqanngillat.
Imminut toqunnissamut pinaveersaartitsinermut periusissiartaassamik saqqummiussinissaq 2022-mi upernaamut kinguartinneqartoq, Mimi Karlsen 2021-mi nalunaarpoq. Kommunit, peqqinnissaqarfik, politiit, timersoqatigiiffiit, ilinniartoqarfiit inuusuttullu ornittagaat ilanngunneqartariaqarnerat taamani patsisiliunneqarpoq.
Meeqqalli inuusutullu MIO aqqutigalugu innersuussutaat aamma ilanngunneqartariaqarmata periusissiartaassamik saqqummiussinissaq upernaarumut kinguartinneqaqqittoq, Naalakkersuisut aggustimi nalunaarput.
- Maanna periusissialiarineqartoq amigaateqassanngitsoq kissaatigaarput. Inuusuttavullu periusissiartaassamik aamma piginnittooqqunarput, Mimi Karlsen oqarpoq.
AAMMA ATUARUK Naalakkersuisoq: Imminut toqunnermik pinaveersaartitsinissamut nutaamik periusissiortoqarpoq
Soormitaavamiuna meeqqartavut inuusuttavullu aatsaat ilanngunneqartut?
Nunatsinni 2021-mi imminut toqussimasut 49-pput, 2020-milu 41-llutik. Tassa imminut toqussimasut ukiuni kingullerni tallimani ikiliartoratik amerliartuaarusaarsimapput.
Siornalu imminut toqoriaraluarsimasutut nalunaarsorneqartut 90-iupput. Tassa imminut toqoriaraluarsimasut ukiuni kingullerni tallimani amerliartoratik ikiliartuaarsimapput.
2021-milu imminut toqunnissamik sioorasaarisimasutut nalunaarsorneqartut 1309-upput. Tassa 2017-imiilli amerleriangaatsiarsimapput, 2017-imimi imminut toqunnissamik sioorasaarisimasutut nalunaarsorneqartut 832-upput.
Kisitsisit qulaani saqqummiussat politiinut nalunaarutiginninnernik tunngaveqarput. Tassa taakku nalunaarsorneqarsimasunit amerlanerusut ilimagineqarpoq.
Tusarfik: Kalaallit Nunaanni Politiit ukiumoortumik 2021-mi nalunaarsugaat
- MIO taamannak ilanngusserusulluni nalunaarpoq, aamma inuusuttut akornanni imminut toqussimasunut tunngasunik ilisimasaqarluarpoq. Taamaammat taakku aamma ilanngunneqarnissaat pingaaruteqarpoq. Taamaammat inuusuttavut ilanngunneqarniassammata kinguarteqqittariaqarsimavarput.
Kisiannimi inuusuttavut qangalili ilanngunneqarsimasariaqaraluannginneramik?
- Ilumummi, inuusuttavut siusinnerusukkut ilanngunneqarsimannginnerat uggornaqaaq. Maannakkulli ilanngunneqarneput, tamannalu pingaarneruvoq, Mimi Karlsen oqarpoq.
Inuit imminut toqussimasunik ilaqutallit nalunngisallilluunniit periusissiartaassami aamma ilanngunneqassasut, taassuma erseqqissaatigaa.
Imminullu toqunnissamik ingammik inuusuttatta akornanni pinaveersaartitsinissaq pingaaruteqarluinnarpoq.
- Imminut toquttoqarsimagaangat inuit akornanni sunnertikkajuttoqartarpoq. Aliasunnerli inuusuttut akornanni aamma atugaakkajuppoq, taakkulu ikiorneqartanngillat iliuusissaaleqisarlutillu. Taamaalillutik imminut toqunnissamik eqqarsaateqalersarput. Taamaammat ilanngunneqarnissaat pingaaruteqaqaaq, Mimi Karlsen oqarpoq.
MIO-mit isornartorsiorneqartut
Periusissiartaassaq naammassinialuusaarneqarpallaartoq, meeqqat pillugit oqaaseqartartoq Aviâja Egede Lynge isumaqarpoq.
Taamaakkaluartoq meeqqat inuusuttullu ingammik imminut toqussimasunik nalaataqarsimasut imminulluunniit toqunnissamik eqqarsaateqarsimasut innersuussutaannik imaqanngitsumik periusissialiortoqaqqissappat uggorissaqalugu, taanna oqarpoq.
- Inuit pineqartorpiaat innersuussutaannik imaqanngitsumik allaffissornerinnarmilli tunngavilimmik periusissialiortoqaqqissappat uggorissaqaara, taanna KNR-imut oqarpoq.
