Mimi Karlsen: Innuttaasut toqqissisimannginnissaminnut suli pissutissaqarluarput
Mimi Karlsen IA-meersoq, Atassutip Namminersorlutik Oqartussani piffissami kingullemi soraarsitsiortornerit atorfinitsitsinerillu pillugit tamanut ammasunik allagaqarneranut atatillugu naalakkersuisooqatigiinni partiit siulittaasuisa pingasut tallimanngormat ataatsimeeqatigiinnerat innersuussutigalugu ullumi taama allagaqarpoq.
Gerhardt Petersenip Atassummeersup Nikku Olsenillu Partii Inuineersup ataatsimiinnerup kingorna oqaatigaat Naalakkersuisut siulittaasuata sulisut pillugit suliarpassuarnut tunngatillugu nassuiaataa toqqissisimanartillugu, taakku tamarmik, Aleqa Hammond naapertorlugu, malittarisassat atuuttut malillugit suliarineqarsimammata.
Inuit Ataqatigiilli isumaqarput Atassut Partii Inuillu eqqissiallattutut misigisimaleraluartut innuttaasut taamatut misigisimalersimanissaannik isumaqartoq.
Inunnik ataasiakkaanik kammalaatersorpasilluni atorfinitsitsisoqarsimaneranik suliat IA-p suli ernumartoqartoqartippai. Aamma ombudsmandip sulianik nammineq misissuinissaminik aalajangersimanerata sunik saqqummiussaqarfiunissaa qilanaarivaa.
- Inuiaqatigiinni toqqissisimaneq pilersinniarlugu Naalakkersuisooqatigiit Inuit Ataqatigiit inakkumavaat pisut tamaasa ammasumik inuiaqatigiinnut saqqummiutequllugit, Atassutikkut Partii Inuillu kisiisa toqqissisarnagit. Inuiaqatigiinnimi Naalakkersuinikkut toqqissisimanissarput tamatta pisariaqartipparput, IA sinnerlugu Inatsisartuni ilaasortaq, Mimi Karlsen taama naggasiivoq.
