Miluumasut imarmiut nerinerisigut aap naqitsinera qaffasippallaalerneq ajorpoq

Uumassulinnut nungusaataatit naasorissaasunik atorneqartarput, soorlu pestcide-nut toqoraatitut. Uumassusilinnut nungusaataatit allat suliffeqarfissuarnit atorneqartarput soorlu arrorsaatinik tunisassiortunit iisartagaliortunillu.

Uumassulinnik nungusaataatit atuinerit kingunerinik, inuit aavisa tillernerisa qullasippallaalersinnaanerinik misissuinerit arlallit takutittareerpaat, aamma takutittareerlugu tamatigut taamaattoqarneq ajormat, Steno Diabetes Center-imi Danmarkimiittumi misissuisuusoq, Marit Eika Jørgensen allappoq.

Taassuma aamma allaaseraa, uumassusilinnik nungusaataatit kingunerinik sunnerneqarsimasut tassaasut issittumi inuiaqatigiit.

- Tamassumunnga pissutaaneruvoq issittumi inuiaqatigiit immami uumasunik miluumasunik nerisaqartuuneri. Immami uumasut miluumasut nerisareqatigiinnermi qullerpaapput, uumassusilinnillu nungusaataatit taakkua orsuaniilersarlutik, Marit Eika Jørgensen oqarpoq.

Stene Diabetes Center Statens Institut for Folkesumdhed peqatigiillutik 2005-miit 2010 tikillugu Kalaallit Nunaanni innuttaasunik misissuipput. Misissuinermi siunertaalluni inuit akornanni aap tillernerisa qaffasippallaarneri.

Misissuinermi inuit 18-nik ukioqalereersimasut 1614-nit misissorneqarput illoqarfinni quligiluaneersut nunaqarfinnilu 13-ineersunit.

Misissorneqartut 40 procentii aavisa tillerneri qaffasippallaarsimapput. Misissuinernullu siuliinut naleqqiullugu, Nunatsinni inuit eurupami inunnut naleqqiulugit aavisa tillerneri qaffasinnerusimallutik. Taamaattorli suli ilisimaneqanngilaq, uumasussusilinnik nungusaataatit pissutaallutik kalaallit aavisa tillerneri qaffasippallaartarsimanersut, imatut paasineqassalluni immami uumasunik miluumasunik nerisaqarnitta kingorna aatta tillernera qaffasippallaalertarluni.