Inuussutissarsiutit

MIllionilikkuutaanik sinneqartooruteqarneq Royal Greenlandimi naammagisimaarneqartoq

Royal Greenlandip ukiup qiteqqunnerani naatsorsuutaasa takutippaat suliffeqarfissuaq akileraartigani 85 millionit koruuninik sinneqartooruteqartoq. Tamannalu Royal Greenlandip pisortaa nunnaaruigaa.

Allattoq Ivik Kristiansen

juunip 09-at 2015 04:32

- Una suliaq ukiut sisamat ingerlanerani suliamut nangeqqiutaavoq. Raajanut pisassiissutit ikiligaluartut tunisassagut nunanut akileerusuttunut nuutsissinnaasimavagut, taamaammallu aningaasanut missingersuutitsinnut naleqquttumik aningaasanik isertitaqarpugut. Tamannalu nuaannaarutigaarput, Mikael Thinghuus oqarpoq.

Sinneqartoorutit akileraannginnermi 85 millionit koruuniusut, akileraareernermilu 50 millionit koruuniusut nalunaarutigineqarpoq, soorlu aamma angusaqarluarnerup malitsigisaanik suliffeqarfissuup patajaassusaa pitsanngoriartuinnartoq nalunaarutigineqartoq. Aningaasat nammineq pigisat 1,2 milliardit koruuniupput.

Aamma atuaruk Royal Greenland aatsaat taama sinneqartooruteqartigisoq

Siorna ukiup taamaalineranut sanilliukkaanni anguneqarsimasut 26 millionit koruuninik pitsaanerupput, raajat qalerallillu aningaasarsiutaalluarlutik.

Royal Greenlandimiillu tamanna angusaalluartutut isigineqarpoq.

- Ataatsiminngaanniit 10-mut nalilissagukku, taava arfineq marluk arfineq pingasulluunniit missaanniittoq isumaqarpunga. Amerlasoorpassuarnik pitsaanernik iliorsinnaasuaannarpugut, Royal Greenlandilli ajornartorsiutaasinnaasut suliarilluarsimagai isumaqarpunga, Royal Greenlandimi pisortaq Mikael Thinghuus oqarpoq.

Aalisakkat qaleruallillu tunineqarneranni qaffasinnerusumik akeqartitsineq isertitat amerlisimanerinut pissutaanerpaavoq.