Millionilikkaat agguataarneqassapput paasissutissat ikikkaluaqisut

BDO-p, nunat assigiinngitsut akornanni siunnersorteqarfik, Naalakkersuisunut naatsorsuussisartut, kommunep nunaqarfiit ingerlatinniarnerinut ikiortariannullu tapersiinermut qanorpiaq aningaasartuuteqartarnersut ilisimanngikkaat paasineqarpoq. 

 

 

Naalakkersuisup BDO-p regnemaskiinaataat atullattaasarpaat. Ukioq manna kommunit isertitai aningaasartuutaallu pillugit suliaqarput. Aningaasat suminngaanneerneri sumullu atorneqarneri erserpata, aningaasat qanoq naapertuilluartumik agguarneqarsinnaanersut Naalakkersuisut aalajangiisinnaalissapput, Henrik Rafn nassuiaavoq.

 

Qanittumili kommunini ataatsimiinnermi peqataasut, akileraaruteqartartut tapiissutaatigut isertitat, ikiugassaasunullu aningaasartuutit kisiinnarlugit sanilliutiinnarneqarsinnaannginnerarpaat.

 

- Tapissutinik kommuunit akornanni agguataareqqinnermi uuttutinik nutaanik piumasoqarsimavoq, amerlasuulli imakittorujuullutik. Taamak BDO-meersoq Henrik Rafn Raatiu aviisimut oqarpoq.

 

Kommuneqarfik Sermersuup kommunalbestyrelsiani sinniisut ataatsimiinnermi, nunaqarfiit, piitsut, innarluutillut tarnimigullu napaatillit amerlassussat qanoq kinguneqassaneranut nalunaarsuutissartaqanngitsoq ilisimatinneqarput.

 

Radioavisimut oqaatigisamisuut: 

 

 - Inuiaqatigiit agguataarneri  najoqqutassatut tatiginarnerpaapput, tassa kommunimi inuusuttut utoqqaallu qanoq amerlatiginersut.

 

- Uuttutit, maanna oqallinnermi atorneqartut, pitsaassusaat assigiinngiiaarput. Imaanngilarli tamatuma assigiinnaraa, paasissutissat aalajangernissamut atugassat amigartuusut. Uuttuutit, assersuutigalugu paasissutissat inuiaqatigiit agguataarnerannut tunngasut pitsaassusaat qaffasippallaanngikkaangata, minnerusumik isumaqartinneqartassasut inassutiginikuuarput, siunnersorti oqarpoq.

 

Inuusuttut utoqqaallu kommunimut aningaasartuutaangaatsiarmata kommuunit akornanni tapissutinik agguataareqqinnermi uuttuutitut atorneqarpoq. Kommuunimi ataatsimiinnermi peqataasoq, Kommuneqarfik Sermersuumi borgemesterip sinniisussaa, Anda Uldumip, sooq Naalakkersuisut uuttuutinik nutaanik akunnattoorfigisaminnik ilassiiniarnersut, Henrik Rafn aperivaa. 

 

 - Apeqqut torrak. Uagut agguataareqqiisoqarnissaa aaliangigarinngilarput. Henrik Rafn taamak akisimasoq ataatsimiinnermut peqataasup oqaatigaa. 

 

Henrik Rafn-li siullermeersumik kommuunit aningaasaqarnerat pillugu naatsorsuussinngilaq, ukiummi arlaliunngitsut matuma siorna Qaasuitsup Kommuniani pisortatut atorfeqarsimavoq. 

 

Piitsut kommuunini ataasiakkaani qasserpiaanersut, nunaqarfiillu ingerlatinniarneri ilumut akisunersoq Kalaallit Nunaata Naatsorsueqqissaartarfiata paasissutissartaqarfiginngilaa. 

 

Naalakkersuisut agguataareqqiinissamut allaqqitassiaani Qaasuitsup kommuunia Kommune Kujallerlu 68 mio. koruuninnattussanngorput. Agguataareqqinnissaq borgmesterit aggustip aallaqqaataata nalaani inaarutaasumik ataatsimiissutigissavaat.