Indiami Nepalimilu inupassuit najugarisatik kuussuit qarsutsineranni qimakkaat

Indiap avannamut kangisissortaani Nepalimilu siallingaatsiarnera pissutaalluni qarsutsinersuaqarpoq, inuillu 4 millionit pallillugit najugaqarfitsik qimattariaqarsimallugu.

Ajunaartut sapaammi amerleriarput ikinnerpaamik 189-inngorlutik, amerlasuullu maqaasineqartutut aamma nalunaarutigineqarlutik.

Tuluit nutaarsiassaqartitsiviat Reuters taama allappoq.

Kuussuaq Brahmaputra Tibetikkoorlunilu, Indiakkoorlunilu Bangladeshikkoortoq, monsunerluni siallingaatsiarnerani qarsutsivoq.

Nuna taamaalinerani ilaatigut sisoorpoq, naatitallu aserorterneqarput inuillu millionilikkuutaat najugarisartik qimattariaqarsimallugu.

AAMMA ATUARUK India nunani coronaviruseqarfiunerpaasuni pingajuusoq

Indiamili innuttaasut kuussuit qarsutsinerinik nunallu sisoorneranik eqqorneqaannanngillat.

Indiami coronavirusip tuniluunneranik aamma eqqorneqarpoq. Inuit coronavirusimik Indiami tunillanneqarsimasut sapaammi 1 millioninngorput.

Nappaammik Covid-19-imik Indiami toqquteqartut 26.800-nit amerlanerusut, kisitsisit Indiami oqartussanit pisortatigoortut takutippaat.

Indiap saniliani Nepalimi oqartussat innuttaasut mianersoqquaat, tamaanimi ulluni tulliuttuni siallingaatsiarnissaa ilimasaarutigineqarmat.