Pinngortitamik illersuiniaqatigiit puisit amii pillugit oqqattut
Greenpeacep Issittumut tunngasunut akisussaasua Jon Burgwald, ileqqorissaarpallaarsimanngitsutut Sea Shepherdimit pasineqarpoq, assersuutigalugumi puisit amiisa nioqqutigineqartarnerat Greenpeacep maanna tapersersormagu, naak puisit amii piujuaannartitsinissaq eqqarsaatiginagu tunisassiarineqartartut. Sea Shepherd taama isumaqarpoq.
Jon Burgwald taamaammat soraarsinneqartariaqartoq, Sea Shepherdip aqutsisuata, amerikamiup Paul Watsonip piumasaraa.
Puisit amiisa tunisassiarineqartannginnissaannut 1980-ikkunni sukataaruteqarsimanertik Greenpeacekkut maanna ajuusaarutigaat, kalaallit tunisassiornerat taamanikkut kingornalu eqqorneqarnerlulluni.
Naggueqatigiit Inuit puisit amiinik tunisaqarsinnaanissaat Greenpeacep kingorna tapersersulerpaa, puisit amiinik EU-mut eqqusseqqusiunnaartoqarnissaa EU-mi nunat ilaasortat amerlanerussuteqartut taamanikkut akuersissutigimmassuk, naggueqatigiillu Inuit matumani ilaatinneqannginnissaat aamma akuersissutigineqarluni, Greenpeacellu Great Greenland kingorna aamma tapersersulerpaa.
Aamma atuaruk Illersuiniaqatigiit Savalimmiuni takornariartitsinermik akornuseeratarsinnaasut
Puisilli amiinik pisigaanni piujuaannartitsinissaq eqqarsaatigineqarneq ajortoq Paul Watsonip Sea Shepherdimeersup Facebookikkut oqaatigaa. Jon Burgwaldillu puisit amiinit sanaanit atisaqarnera pissutaalluni soraarsitaasariaqarpoq, Watson ilaatigut oqarpoq.
Aamma atuaruk Greenpeacekkut nuannarineqarusuttut