Mikael Petersen KNAPK-mi atorfinitsinneqartoq

Partiimi allaattaanerusimasoq, Mikael Petersen, kanngunarsaasimasutut siorna pisuutinneqartoq, KNAPK-mi atorfinitsinneqarpoq.
KNAPK-mi sulisut marluk suliunnaarsinneqarnerata kingorna, Mikael Petersen atorfinitsinneqarpoq. Assi © : KNR
Allattoq Marie Kuitse
marsip 21-at 2022 10:13

KNAPK-mi siunnersortitut atorfilik Akara Skifte suliunnaarsinneqarpoq, taarsiulluguli Mikael Petersen atorfimmut inissinneqarpoq.

Aalisartut Piniartullu Kattuffianni KNAPK-mi pisortaaneq, Vittus Qujaukitsoq KNR-imut taama uppernarsaavoq.

Atorfinitsitsinermut tunngatillugu pisortaaneq, Vittus Qujaukitsoq oqaaseqarusunngilaq.

Tamanna pillugu Mikael Petersen KNR-imiit oqaaseqartinniarsarivaput.

KNAPK-mi soraarsitsiortorneq

KNAPK-mi sulisut marluk suliunnaarsinneqarnerata kingunitsianngua Mikael Petersen atorfinitsinneqarpoq.

KNAPK-mi pisortaanerusimasoq, Bjarne Lyberth soraarsitaasoq tallimanngornermi nalunaarutigineqarpoq. Taassuma atuuffiua Vittus Qujaukitsumit taarserneqarpoq.

Taassuma kingorna allattoqarfimmi soraarsitsisoqaqqippoq. Siunnersortitut atorfilik, Akara Skifte arfininngornermi soraarsinneqarmat.

Tamanna KNAPK-ip siulittaasuata Nikkulaat Jeremiassenip kattuffik sanngiimmat nukittorsarneqartariaqarmallu, taamaaliortoqarneranik tunngavilersuutigaa.

Mikael Petersen

Siumut partiimi allatsigisimasaa, Mikael Petersen Nunatta Eqqartuussisuuneqarfianit kannguttaatsuliorsimasutut septemberimi piumasaqaatitaqanngitsumik ulluni 40-ni pineqaatissinneqarsimasunut inissiisarfimmiittussanngortinneqarpoq.

Mikael Petersen arnanut sisamanut Siumup partiiata allaffianut 2013-imit 2019-imut attuumassuteqartunut kannguttaatsuliorsimasutut unnerluutigineqarpoq.

Mikael Petersen Siumumi ukiuni 38-ni suliarineqarpoq, taannalu Naalakkersuisunut aamma ilaasortaanikuulluni. Aamma Siumumi siulittaasumut tullersortaanikuuvoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk