Miiti Lyngep taartissaatut piukkussat arlaqarput

Randi Brobergip, Partii Inuit Inatsisartuni ilaasortaatituaata, uranimut akuersaanngilluinnarnerup atorunnaarsinneqarnissaanut akuersilluni taaseqataarusunnginnera pissutigalugu taamatut pisoqarpoq.

Ineqarnermut, pinngortitamut avatangiisinullu naalakkersuisussatut arlallit piukkunnarsinnaapput. Lyngep taartissaata Hammondip partiianit Siumumeernissaa ilimanartupilussuuvoq, aamma Hammond tupaallatsitsilluni Inatsisartunut qinigaasimanngitsumik naalakkersuisunngortitseratarsinnaavoq.

Gerhardt Pedersenip naalakkersuisunngornissani ilimagisimagunaraluarpaa, Nanoq Beerimili kusanaatsuliortoqarsimaneranut peqataanerata oqallisaanerujussuatigut naalakkersuisussatut ilimanarunnaarluni. Partiimit naalakkersuutitaqartumit Atassummit piukkunnartutut taaneqarsinnaasoq tassaavoq Sivert K. Heilmann, Inatsisartuni sulinermik misilittagartuujusoq. Naalakkersuisullu taamatut misilittagalimmik ilaqarpianngillat. Taannalu Naalakkersuinngortinneqassappat Knud Kristiansenip Inatsisartunut uternissaa ilimanarluinnarpoq.

Ineqarnermut, pinngortitamut avatangiisinullu naalakkersuisunngortitassatut periarfissaalluarsinnaasutut oqaatigineqarsinnaasoq tassaavoq Kristian Jeremiassen. Siumumi avannaamiut pillugit aammali Jeremiassenip uranimut akuersaanngilluinnarnerup atorunnaarsinneqarnissaanut akuersilluni taaseqataaneranut akilerniarlugu. Jeremiassenip Hans Enoksen peqatigalugu siunnersuutip ataatsimiititaliami suliarineqarnissaanik qulakkeerinneqataanerata kingorna Jeremiassenip qanoq taasinissaa nalornissutigineqaleraluarsimavoq.

Aleqa Hammond siornatigut qinigaanngitsumik naalakkersuisunngortitsereernikuuvoq, taamaalioqqissinnaallunilu. Apeqqutaaginnassaarlu Hammondip kina Naalakkersuisunngortikkusussaneraa. Tamanna aqagu marlunngornermi akissutissarsissavarput.