Michael Binzerip taartissaa nassaaraat

Pisortaaninngortussaq suliffeqarfimmi takortarineqanngitsoq Air Greenlandimi siulersuisut siulittaasuat Jens Wittrup Willumsen oqarpoq. Michael Højgaard Air Greenlandimi 1994-miit 98-mut sulisimasoq siullermik teknikkimut pisortaareerluni aningaasarsiornermut akisussaasutut qaffatsinneqarluni.

Michael Højgaardip Air Greenlandimi atorfeqarsimanera aammalu Danmarkimi inuussutissarsiornermi misilittagaqarluarnera Nunatta timmisartortitseqatigiiffiani pisortassatut toqqarneqarneranut oqimaalutaasimavoq.

- Michael Højgaardip atorfininneratigut Air Greenland silaannakkut angallannermik misilittagaqarluartumik minnerunngitsumillu ukiuni tallimani Kalaallit Nunaanniinnermigut ilisimasaqarluartumik pisortartaassaaq. Kalaallit Nunaat piffissami aggersumi annertuumik allanngortoqarfiussaaq, sulisullu peqatigalugit Air Greenlandip pitsaasumik ineriartorneranik ingerlatseqqissinnaasumik pisortaaneqarnissaq annertuumik pingaaruteqarpoq, Air Greenlandimi siulersuisut siulittaasuat Jens Wittrup Willumsen oqarpoq.

- Kalaallit Nunaannut tassangaanniillu silaannakkut angallannermi unammillerneq annertusiartorpoq, niuerfissalli allat aamma takkussuutissapput. Air Greenlandimi pisariaqartinneqarpoq pisortaq suliffeqarfiup nukittuumik unammillersinnaaneranut qulakkeerisinnaasoq, aammalu suliffeqarfimmut inuiaqatigiinnullu iluaqutaasussamik ineriartorfiusinnaasunik takunnissinnaassusilik. Michael pisortaavoq angusaqarusussuseqarlunilu uummaarissoq suliffeqarfimmilu pisortatut sulisunik peqataatitsinermik attaveqarnissamillu pingaartitsisoq, Jens Wittrup Willumsen oqarpoq.

Michael Binzer Air Greenlandimi ukiut tallimat pisortaaneroreerluni Tele Postimi pisortaanertut apriilip aallaqqaataani sulilissaaq.