Mianersortumik isumaqatigiinniartoqassasoq Nathanielsenip naatsorsuutigaa
Aningaasaqarnermut Naalakkersuisoq, Naaja H. Nathanielsen (IA) naammagisimaarinnippoq Inatsisartut paasinnilluartumik pissuseqarlutik oqallimmata, taassumalu naatsorsuutigaa isumaqatigiinniarnerit aallartinneqarpata tamanna attatiinnarneqarumaartoq:
- Inuussutissarsiuteqartut atugaat. Aningaasat naleerukkiartornerat pisisartullu akiliisinnaassusaat pillugit partiit isummersuutitik apuuppaat. Soorunami aamma siunissami sulisussanik isumalluuteqarnerup qanoq ikkumaassusia kiisalu nunatta karsiata isertikkumaagai tikinneqarput.
- Sorpassuit tikinneqarput, taamaattorli naatsorsuutigilluinnarpara aningaasanut inatsisissatut siunnersuummut partiit allannguutigitikkusutaminnik isumaqatigiinniarnerni ersarinnerusumik apuussiumaartut, Naaja H. Nathanielsen ataatsimut eqikkaalluni oqarpoq.
Taamaattorli siullermeerinninnermi partiit kissaatigisaat qimerlooraanni, aningaasanut inatsisissatut siunnersuutip ataqatigiissinniarnissaanut suliassaqangaatsiassasoq ilimagissallugu pissutissaqarluarpoq.
Inuit Ataqatigiit:
Akileraarutinit akitsuutinillu isertitat ikiliartornissaat tunngavigalugu missingersuusiorsimaneq sumik tunngaveqarnersoq itisilerneqassasoq.
Peqqinnissaqarfimmi sulisussanik pissarsiniartarneq sulisooreersunillu suliinnartitsiniarluni tamaviaarneq ingerlatiinnarneqassasoq.
Akileraartarneq pillugu nutaamik aaqqissuusseqqittoqassasoq piujuartitsinissamut saqinneq ilanngullugu.
Siuariartortitsinermut piusinnaassutsimullu pilersaarut II.
Iluarsaassinermut kinguaattoorutit aallunneqarnerunissaat.
Tamat ilinniagaqalernissaanut qulakkeerinninneq.
Siumut:
Umiarsuit takornariartaatsit akiliinerusalernissaat.
Ikummatissat akii pillugit pilersaarusiornissaq. (Akinut isumaqatigiissutaasut 2023-ip naanerani atorunnaassammata.)
Sinerissap qanittuani aalisarnermut tapiissutit amerlanerusut.
Akileraartarnerup aaqqissuussaanerata allanngortinneqarnissaa.
Sanaartornerup nuna tamakkerlugu siaruarneqarnissaa.
Inuusuttunut utoqqarnullu pisinnaanerusunut inissialiornermut aningaasaleeqataanissaq.
Naleraq:
Tasiilami erngup nukinga atorlugu nukissiorfiup annertusarneqarnissaa.
Tasiilami efterskoleqalernissaa.
95/5 inissialioriaatsimut aningaasaliinissaq.
Soraarnerussutisiaqalernissamut ileqqaartussaatitaanerup unitsinneqarnissaa.
Akitsuutit piiarneqarnissaannut pilersaarusiortoqarnissaa.
Demokraatit:
Neqinut neqinillu nioqqutissianut akitsuutit peerneqarnissaat.
Ilanngaassiviup atuutilersinneqarnissaa.
Pisortat allaffissuini atorfillit ikilisarneqarnissaat.
Politikkikkut partiinut tapiissutit ikilisinneqarnissaat.
Suliffissarsiornermi tapiissutisisarnerup atorunnaarsinneqarnissaa.
Ingerlatsinermut tapersiisarnermullu aningaasartuutit 1 procentimik ilanngarneqarnissaat.
Atassut:
Avataaniit sulisussarsiortarnermi aaqqissuusineq eqaannerusoq.
Inummut ilanngaat peerlugu assigiimmik akileraaruteqarneq eqqunneqassasoq.
Ineqarnermut akiliutit malinnaatinneqalissasut.
Illuut A/S aamma A/S INI ataatsimoortinneqalissasut
IA akissutiserusuppoq
Inuit Ataqatigiit Naalakkersuisut sukannersumik aningaasaqarnikkut aqutsinissamik kissaateqarnerannut isumaqataapput, taamaattorli aningaasanut inatsisissamut tamakkiisumik tunuliaqutaassagunik assigiinngitsunik apeqquteqarput.
Partiip paaserusuppaa sooq akileraarutitigut akitsuutitigullu isertitassat appariartornissaat naatsorsuutigalugu Naalakkersuisut missingersuusiorsimanersut. Aamma pingaartumik peqqinnissaqarfimmi sulisussarsiornermut sulisooreersunillu suliinnartitsiniarluni iliuusissatut pilersaarummik ujartuipput.
Siumut ikummatissat akiinut ernumassuteqarpoq
Siumup ikummatissat akitsoriartulernissaat ernumassutigaa, ikummatissat akii pillugit isumaqatigiissut 2023-mi atorunnaartussaammat.
Taamatuttaaq sinerissap qanittuani aalisartut tapersersorneqarnerusariaqartut aammalu aalisartunut piniartunullu siunnersuisarneq nunatta karsiata akiligaanik ingerlatiinnarneqassasoq partii piumasaqarpoq.
Naleraq piumasarpassuaqarpoq
Naleraq aningaasartornerulissutaasussanik siunnersuuterpassuaqarpoq. Ilaatigut Tasiilami erngup nukinga atorlugu nukissiorfiup allilernissaanik kissaateqarput. Aamma meeqqat atuarfiinik iluarsaassinissamut nutaamillu sanaartortoqarnerani nunatta karsia akileeqataasassasoq.
Demokraatit isornartorsiuipput
Demokraatit Naalakkersuisunut isornartorsiuingaatsiarput. Partii isumaqarpoq Naalakkersuisut akiligassanik siunissamut ajattuiinnartut. Tamatuma saniatigut nunatta karsiata isertitaqarnerulissutigisinnaasaanik assigiinngitsunik partii siunnersuuteqarpoq. Taakku suli piumasaraat Ilanngaassivimmik aaqqissuussineq atuutilersinneqassasoq, tamatumalu saniatigut pisortat ingerlatsinermut tapersiisarnermullu aningaasartuutaat 1 procentimik sipaarniuteqarfigineqassasut piumasaqarlutik.
Atassut innuttaasut pisisinnaassusaat pillugu ernumassuteqaqaaq.
Isumaqatigiinniarnissamut tigoriaannarnik aningaasaqanngingajappoq
Kissaaterpassuit oqallinnermi saqqummertut ilamininngui taakkuupput. Naalakkersuisummitami aningaasanik qanoq amerlatigisunik tigoriaannaateqarpat:
- Soorlu ilisimatitsissutaareersoq, isumaqatigiinniarnissamut aningaasanik tigoriaannaqanngilluinnangajappoq. Isumaqatigiinniutigisinnaasagut annikitsuararsuupput, taamaattumik aningaasartornerulissutaasunik piumasaqarniaraanni aningaasat suminngaaniit aaneqassanersut aamma ilanngullugu innersuussisarnissaq pisariaqarpoq.
- Taamattorli partiit mianersortumik ingerlatsinissamut piumassuseqarnernertik attatiinnarumaaraat qularinngilara. Taamatummi nipeqarput, tassa akisussaassusilimmik ingerlatsisoqarnissaanik piumassuseqarput. Tamanna upperissallugu toqqarpara, sillimaffigereerlulugu isumaqatigiinniarnernut takkukkumaartut naatsorsuutigaara, Aningaasaqarnermut Naalakkersuisoq, Naaja H. Nathanielsen KNR-imut oqarpoq.
Isumaqatigiinniarnerit tallimanngorpat aallartissapput, aningaasanullu inatsisissap aappassaaneerneqarnissaa sisamanngornermi oktoobarip 27-iani pissaaq.
