Mette Frederiksen statsministeriusimasuni inuusunnerpaalersinnaasoq

Socialdemokraatit siulittaasuata, Mette Frederiksenip naalakkersuisunik nutaanik pilersitsinissami siuttuunissaanut suliassaq imaannaanngitsuussaaq.

Tamannali iluatsissaguni Danmarkip naalakkersuisuini siulittaasuusimasuni tamat oqartussaaqataanerata 1849-mili eqqunneqarneranit aatsaat taama inuusutsigisumik siulittaasoqassaaq.

Jylland-Postenip statsministeriusimasut, premierministeriusimasut, konseilspræsidentiusimasut tunngavigalugit kisitsinerata tamanna takutippaa.

Sisamanngorneq, qinersinerup aqaguani Mette Frederiksen 41-nik ukioqarpoq.

Danmarkimi poltiikkikkut siuttuusimasut inuusunnerpaartarisimasaat tassaavoq Carl Theodor Zahle. Taanna 43-nik ukioqarluni oktobarip 28-at, 1909-mi radikalini konseilspræsidentinngorpoq.

Kisitsinerit naapertorlugit Anders Sandøe Ørsted 74-inik ukioqarluni 1853-imi premierministerinngortoq ukioqqortunerpaasimavoq.

1849-mit maannamut statsministeritut atuuffik 51-eriarluni taarserneqarpoq. Taamanernit maannamut statsministeriusarsimasut ukiui agguaqatigiissillugit 54,25-uvoq.

Tunngaviusumik inatsisit ulluanni pingasunngornermi qinersisoqarmat partiit saamerliit 91-inik qinigaatitaqarput, taamaalillutillu qinersinermi ajugaallutik. Alternativelli qinigaatitaat tallimat kisinneqaqataanngillat.

Partiilli talerperliit ingerlalluanngillat, taakku Nye Borgerligep qinigaatitai sisamat kiseqataanngikkunik 75-inik qinigaatitaqarput.

Politikerit siuttorisimasaanni inuusunnerni allani Hans Hedtoft (S) siullermik 1947-mi atuutilerami 44-nik ukioqartoq Jyllands-Postenip ilaatigut eqqaavaa.

Statsministeri, Lars Løkke Rasmussen (V) aamma statsministeriusimasoq Helle Thorning-Schmidt (S) naalakkersuisuni siuttunngoramik 44-nik ukioqarput

/ritzau/