Mette Frederiksen Danmarkimi inuusuttunut: Nuannannerit annikillisigit
Inuusuttut coronamik tunillatsinnissat pinaveersaarniarlugu nuannannitik annikillisariaqarpaat.
Danmarkimi ministeriuneq, Mette Frederiksen (S) oqalugiarnermini ersarissumik taama kaammattuuteqarpoq.
- Nuannannerit piffissami aggersumi annikillineqartariaqarput. Najoqqutassat kamanit malinneqassapput, inuillu amerlasuut qanimut naapinnginnissaat tamatta eqqarsaatigissavarput, ministeriuneq oqarpoq.
Danmarkimi illoqarfiit pingaarnersaani unnuaanerani nuannannernut killilersuinerit nutaat marlunngornermi saqqummersinneqareersullu taama kaammattuuteqarpoq. Saqqummiussineq peqqinnissamut utoqqarnullu ministerip, Magnus Heunickep (S) tusagassiortunik katersortitsinerani ilaatigut pivoq.
AAMMA ATUARUK Danmarkimi coronamik tunillatsissimasut apriilimili aatsaat taama amerlatigisut
Killilersuineq illoqarfiit pingaarnersaata kommuniini 17-ini imerniartarfiit, sutorniartarfiit, neriniartarfiillu sisamanngornermit ulluni 14-ini unnukkut qulinut matusassanerannik kinguneqarpoq.
Tamatuma saniatigut taakkunani isersimasut anersaartuutinut illersuuteqarnissaannut piumasaqaatit aamma atulersinneqarput.
Nammineq nuannatsitsinerit qulinut unittariaqartut
Danmarkimi naalakkersuisut angerlarsimaffinni nammineq nuannatsitsinerit aamma qulinut unittariaqartut innersuussutigaat.
Tamatuma saniatigut Statens Serum Institutimi pisortap, Kåre Mølbakip inuit ukiaanerani ilagisartakkat amerlassusaat killilersimaarneqarnissaat kaammattuutigaa.
- Inuit immaqa tallimat qulilluunniit ilagerusutat nassaarineqarsinnaapput. Taakkulu ukiap ingerlanerani ilagisarlugit, Kåre Mølbak marlunngornermi tusagassiortunik katersortitsinermi oqarpoq.
AAMMA ATUARUK Danmarkimi tunillatsissimasut amerliartoraluartut malittarisassagut tunillatsissimasunik nunatsinnut isitsaaliisut
Kaammattuuteqarneq taanna ministeriunerup taperserpaa.
- Inuiaqatigiit iluanni attaveqaatigut ukiap ingerlanerani annikillisariaqarpagut.
Inuit ikinnerusut naapittakkit
Ministeriunerup oqarnera naapertorlugu tamatuma saniatigut inuit ikinnerusut eqimattanilu annikinnerusuni piffissami naapittarnissaat sungiuttariaqarparput.
Københavnimi inuusuttullu akornanni tunillaassuuttoqarnera kisimi qaffasinngitsoq ministeriunerup aamma erseqqissaatigaa.
- Kommunit 50-init amerlanerusut 100.000-inik innuttaasoqassuseqarneq aallaavigalugu tunillatsissimasut amerlassusaasa ernumanarnissaanut killissaritinneqartumik 20-mik qaangiisimapput.