Sumiiffiit amerlanerusut Google Street Viewikkut takuneqarsinnaalersut
Street Viewimik atuisut nunaqarfinni Kangaamiuni, Itillermi, Kuummiini, Isortumi Kulusummilu assilisat nutaat takusinnaaleraat, Visit Greenland tusagassiuutinut nalunaarummi allapput.
Aamma Aasiaat, Maniitsoq, Nuummi majuartaat, Qullissani ukiukkut pisuttuartarfik, Zackenbergimilu aasaanerani assilisat takuneqarsinnaalerput.
Assilisat nutaat Asiap, Visit Greenlandimit, Air Greenlandimit namminneq kajumissutsiminnik suleqataasunit aningaasaliisuniillu suleqatigineqarluni sulissutigisimagai, Visit Greenland allappoq.
Aamma atuaruk Nunaqarfiit illoqarfiillu siornatigut takusimanngisatit Googlemi takusinnaalissavatit
Illoqarfiit nunaqarfiillu Street Viewimi takuneqarsinnaareersut assii siorna nutaanik taarserneqartussaasimapput. Suliamullu tassunga atatillugu Googlep assiliivia, Trekkerimik taaguutilik, nassarlugu kitaata sineriaani, Qeqertarsuup Tunuani Tunumilu assiliisaqartaarsimallutik, Asiamiinngaanneersoq Eva Mätzler ilaatigut oqaluttuarpoq.
- Inuit qarasaasiatigut sumiiffinni pineqartuni pisuttuartuusaarsinnaalernerat nuannaarutigaarput, Eva Mätzler oqarpoq.
Illoqarfiit nunaqarfiillu allat Street Viewimut ilanngunneqarnissaat Asiap Visit Greenlandillu Google suleqatigalugu pilersaarutigaat, illoqarfiilli nunaqarfiillu sorliit ilanngunneqarniarnersut suli oqaatigisinnaanngilaat.