Meghan Canadamiippoq Harrylu aaqqiissuteqaqataaniarsaraluni

Prins Harry suli Tuluit Nunaanniippoq, nulialu Meghan sivikitsumik Londonimeereerluni ernertik, Archie meeqqanik paarsisumik paarineqarsimasoq ornillugu Canadamut uterpoq.

Aappariit Tuluit Nunaanni kunngikkormiunut pisussaaffimminnit avissaareernerminni maanna taama killiffeqarput.

Harryp aamma angutaata, prins Charlesip Harryllu angajuata prins Williamip kunngikkormiuni ilaqutariinni pissutsit nutaat qanoq inissisimalissanersut aaqqiissuteqarfiginiarsaraat.

Charlesip Williamillu siunnersuisartutik prins Harryp Meghanillu siunissami inissisimanissaannik tuluit canadamiullu naalakkersuisuinut suleqatigiissuteqaqqugaat, aviisip The Guardianip allaaseraa.

PIlersaarut ulluni qaninnerni sapaatillu akunnerini aggersuniunngitsoq piareereersimassapput.

Aappariit kunngikkormiuni ilaqutariinni nuimasuujunnaarniarlutik ”aningaasaqarnikkullu namminersulernissaminnik sulissuteqarniarlutik”, pingasunngornermi nalunaarutigaat.

Nalunaaruteqarnerat dronning Elizabethimut kunngikkormiunullu konservativeusunut annilaarnartuuvoq.

AAMMA ATUARUK Harry Meghanilu kunngikkormiunit tunuaaminiartut

Kunngikkormiut illussaarsuani sulisut tusarfiit oqarnerat naapertorlugit 35-nik ukiulik prins Harry 38-nillu ukiulik Meghan pingasunngornermi Instagramikkut nalunaaruteqannginnerminni kunngikkormiuni ilaquttaminnut arlaannaannulluunniit isumasioqateqaqqaarsimanngillat.

Aappariit nalunaaruteqarnerminni Tuluit Nunaanniittarnissartik Amerikallu avannaaniittarnissartik oqaatigaat. Meghan Canadamut atassuteqangaatsiarpoq, Harrylu 2018-imi katinngikkallaramiuk isiginnaartitsisartuulluni tusaamasaq.

Kunngikkormiut illussaarsuanit, Buckingham Palacemit pilersaarummik illuatungeriit tamarmik akuerisinnaasaannik ulluni qanittuni piareertoqarnissaa neriuutigineqartoq, BBC-ip allaaseraa.

Prins Harrylli nammineq Maghanillu namminersornerulerniarnertik pillugu kunngikkormiuni oqaloqateqarsimannginneragaanerat eqqortuunersoq nalunarpoq.

Prins Harryp ataatani, prins Charlesilu siullermik oqaloqatigisimagai Harryllu dronningi tamatuma kingorna ataatsimeeqatigiumasimagaa tuluit nutaarsiassaqartitsiviisa allaaseraat. Ataatsimiinnissaq taanna aappariit Canadamut angalareerunik pissasoq Harryp kissaatigisimavaa. Dronningillu tamanna aallaqqaammut itigartitsissutigisimavaa.

Prins Harry Meghanilu tuluit tusagassiorfiinit malersorneqartutut misigisimallutik piffissami sivitsortumi naammagittaalliuutigisimavaat.