Harry Meghanilu kunngikkormiunit tunuaaminiartut

Aappariit Instagramimi quppernerminni taama paasissutissiipput.

- Qaammaterpassuarni eqqarsaatigereerlugu ilutsinnilu oqaluuserereerlugu ukioq manna nutaamik ikaarsaariarfeqarluniarluta aalajangerpugut.

- Kunngikkormiuni ilaqutariinnit tunuarniarnissarput, aningaasaqarnikkut namminersortunngornissarput, ataqqinartorsuarmullu dronningimut tapersersuiinnarnissarput siunertaraarput, aappariit quppernerminni taama allapput.

Aappariit Tuluit Nunaanniitttarnissartik Amerikallu avannaaniittarnissartik pilersaarutigalugu ilanngullugu oqaatigaat, taamaakkaluartorli dronning Elizabethimut pisussaaffimminnik ataqqinninnarniarput.

Kunngikkormiuni ilaqutariinni ukiup ingerlanerini allanngungaatsiartoqaqattaareernerani aappariit taama nalunaaruteqarput.

AAMMA ATUARUK Meghanip tuluit aviisiat suliassiissutigaa

Harry Meganilu tusagassiorfinnit ukkatarineqaqattaareerlutik Canadami juullisioriarput.

Aappariit piffissami sivitsortumi tusagassiorfinnut akerleriissuteqarsimapput. Tuluit prinsiata tuluit aviisii qassiiusut oktobarip qaammataani eqqartuussivimmut suliassanngortippai.

Meghanip allap susassarinngisaanik allagai atorlugit Mail on Sundayip inatsisinik unioqqutitsisumik aappariit saqqummersissimagai unnerluutigineqarpoq. Tusagassiorfiillu The Sun aamma The Daily Mirror oqarasuaatinut unioqqutitsisumik isersisimasutut eqqartuutitinniarneqarput.

Tamatuma saniatigut Harryp qatanngutiminut Williamimut atassuteqarnera annikillisimanerarneqarpoq.

Prins Harry amerikamiu isiginnaartitsisartoq, Meghan Markle ukioq ataaseq affaalu aapparereerlugu 2017-imi katikkumavaa. Taakku 2018-imi maajimi katipput. Katinnerannit ukiup ataatsip missaa qaangiummat ernera Archie inunngorpoq.