Meeqqerivimmi oquk
Meeqqerimmi Angajo-mi Ilulissani oqoqartoq paasineqarpoq. Sulili misissorneqarpoq iluarsaassinissaq qanoq annertutigissanersoq aammalu qanoq akeqarumaarnersoq.
- Meeqqerivik misissorsimavarput ajoraluartumillu paasivarput oqoqartoq. Assassornermik suliallit maanna iluarsaagallareerput tassani pingaarnertut oquup siaruaannissaa unitsinniarneqarluni, taama KNRimut nalunaarpoq Qaasuitsup kommunea.
Meeqqerivimmiittartut meeqqat 60-it kulturikkut illorsuarmi Sermermiuni maanna paarineqartarallarput qaammat ataaseq marlulluunniit tassaniikkallassallutik.
- Oqareernittut assassornermik suliallit misissorlugu aallartereerpaat oquup qanoq siaruaatsigisinnaasimanera. Taakku misissuinerat naammassitinnagu oqaatigisinnaanngikkallarparput iluarsaassineq qanoq akeqarumaarnersoq, taama Qaasuitsup kommunea nalunaarpoq.
Meeqqerivimmi, septemberimi 1959-imi atulersumi, tipi malussarfigineqartarsimavoq. 2010-milu ukiakkut ruujorit iluarsaanneqarsimapput. Maannali tassa paasineqarpoq iluarsaanneqartariaqalersut ruujorinuinnaq tunngasuunngitsut.
