Meeqqat takorluugaat qalipagaallu saqqummersinneqarput

Nunaqarfik Kulusuk aasaq aggustimi ukiunik 100-nngortorsiormat saqqummersitanik, meeqqat inuusuttullu atuarfimmi suliaminnik Katuami saqqummersitsipput.

Saqqummersitsineq nunaqarfiup qanga maannalu isikkuanik siunissamilu qanoq ikkumaarneranik takorluuinilikkersaarutaavoq.

Leise Johnsen, NAPA-mi pisortaasoq scenografi Annika Nilsson peqatigalugu suliamik isumassarsisuuvoq saqqummersitsinermilu aaqqissuisuulluni.

Kulusumi atuartut ilaata 14-inik ukiullip Olga Mikaelsenip Katuami saqqummersitsineq peqataaffigingamiuk anginaarpaa.

- Tupinnaqaaq, saqqummersitsineq mikinerussangatikkaluarpara, sunaaffa anginerujussuusoq. Kulusup ukiuni 2100-kunni illoqarfinngornissaanik takorluukkat saqqummersitatta ilagaat, Olga Mikaelsen oqarpoq.

- Nunaqarfipput Kulusuk aasaq aggustimi 100-liimmat immiussaq takullugu nuannerpoq, Olga Mikaelsen oqarpoq.

Kornilius Poulsenip siunissami Kulusumi busseqalersinnaanera takorluugaraa nunaqarfik angivallaanngimmat bussinut ilaaneq akisuallaassangatinnginnamiuk aamma Tivoli assigiinngitsunik pinnguarfigineqarsinnaasoq nunaqarfimmi takorluugaraa.

- Nunaqarfiup allinissaa illullu amerlanerulernissaat takorloorpara. Inuit aningaasarsiorlualernissaat aamma suliffeqarfiit amerlanerulernissaat takorloorpara, Kornilius Poulsen oqarpoq.

- Atuartut qaqutiguinnaq oqaluttuarnissaminnik periarfissaqartarput, Katuami titartagaat takuniarneqarsinnaapput sooq taama takorluugaqarnersut paasiniarneqarsinnaalluni, Leise Johnsen oqarpoq.

Aamma suleqataata svenskiusup Annika Nilssonip oqaatigaa saqqummersitsineq Kulusumi inuunermik takutitsisoq, eqqumiitsulianik saqqummersitsinerunngitsoq kisianni atuartut inooriaatsimut isiginnittariaasaannik takutitsinerusoq.

- Inuit amerlavallaanngitsut nunaqarfik ilisimavaat, taamaammat assitigut susoqarsimanera inooriaaserlu takuneqarsinnaammat torraqaaq, Annika Nilsson oqarpoq.

Saqqummersitsineq februaarip 24-iat ilanngullugu Katuami takuniarneqarsinnaavoq.