Meeqqat sakkortusiartortut kommunep malugaa

Nuummi meeqqat inuusuttuaqqallu qulingiluaniit 13-it tikillugit ukiullit meeraqatiminnik persuttaasartut Nuummi politiit sapaatip-akunnera 13 pillugu nalunaarusiaanni takuneqarsinnaavoq, saassussisarnerallu aamma takornartaanngitsoq Kommuneqarfik Sermersuumit oqaatigineqarpoq:

- Taamaaliortoqartarnera naliginnaasuuvoq, tupinnartuunngilaq,
Malene Filemonsen, Kommuneqarfik Sermersuumi meeqqanik inuusuttunillu siunnersorti taama oqarpoq.

Meeqqat meeraqatiminnik saassussigaangamik ilaatigut sakkulersortarput, imaluunniit sakkulersornissamik sioorasaarisarlutik:

- Sodavandit puukuinik savinnillu sakkoqartarput, meeqqamiit meeqqamut assigiinngillat, Meeqqanik inuusuttunillu siunnersorti Malene Filemonsen taama oqarpoq.

Nuummi politiit sapaatip-akunnerata siulianut atatillugu nalunaarusiaanni ilaatigut takuneqarsinnaavoq meeqqat meeraqatiminnik persuttaasartut pillugit saaffiginnissutit katillutik pingasuusimasut.

Inuusuttut tallimat arfinillit inuk ataaseq saassussimagaat timaatigut isimmittarlugulu tilluarsimallugu, Nuup politiivini pigaartup Bjørn Bjerregaardip ilaatigut oqaatigaa.

Meeraqatiminnik saassussisarnerit qassiunersut kisitsisaatigineqanngilaq, saassussisarnerilli sakkortusiartortutut nalilerneqarput, meeqqallu sumiginnagaasimasut ajornartorsiummut pissutaakkajuttut aamma oqaatigineqarpoq.

Taamaattoq meeraqarpoq ikiussallugit ajornakusoorsinnaasoq:

- Sapinngisarput tamaat ikiorniarsarisarpavut, ikiorsinnaasavut ikiortarpavut, ilaqarporli ikioruminaassinnaasunik. Tamanna nassuerutigisariaqarparput, Vivi Christiansen, Kommuneqarfik Sermersuumi Ilaqutariit Meeqqallu pillugit immikkoortortaqarfimmi pisortaq oqarpoq.