Meeqqat oqaaseqartartuat anstaltimut pulaarpoq
Niviarsiaraq 15-inik ukiulik, ulloq unnuarlu inissiisarfinni inissaqanngitsoq, taamaattumillu pinerluuteqarsimasunut Nuummi inissiisarfimmiitinneqartoq Radioaviisimit malinnaavigaarput.
Niviarsiaraq tillinniarsimasutut aamma persuttaasimasutut pasineqarpoq. Radioaviisimi kingullermik sammigatsigu, niviarsiaraq decembarip pingajuanniit 14-iata tungaanut pinerluuteqarsimasut inissiisarfimmiitinneqartoq oqaluttuaraarput.
Niviarsiararli 18-it inorlugit ukioqartoq, pinerluuteqarsimasut inissiisarfimmiitinneqartoq kisiartaanngilaq. Inuusuttuaqqat allat marluk aamma 18-it inorlugit ukiullit aamma inissiisarfimmiitinneqarput.
Naalagaaffiit Peqatigiit meeqqat piginnaatitaaffii pillugit isumaqatigiissutaat unioqqutinneqartoq, Meeqqat illersuisuata Aaja Chemnitz Larsenip oqaatigaa.
- Naalagaaffiit Peqatigiit meeqqat piginnaatitaaffii pillugit isumaqatigiissummi paragraf 40 unioqqutinneqarpoq, tassani allassimavoq meeqqat inuusuttuaqqallu 18-it inorlugit ukioqartut, pillarnagit innuttaasunut ilaalerseqqinneqarnissaat salliutinneqartassasoq, Aaja Chemnitz Larsen oqarpoq.
Meeqqat illersuisuata, Aaja Chemnitz Larsenip neriuutigaa paasisaqarfigissallugu, inuusuttuaqqat sooq pinerluuteqarsimasunut inissiisarfimmiitinneqarnersut, taakkulu qanoq iliuuseqarfigineqarnissaat paasiniagassaanut ilaalluni.
Meeqqat inuusuttuaqqallu 18-it inorlugit ukiullit pisariaqanngitsumik pillarneqartassanngitsut, Aaja Chemnitz Larsen isumaqarpoq. Tassami meeqqanik inersimasutut pillarneqartut qaqugorsuarmut ikilerneqaatigisarmassuk.
- Inuusuttuaqqat pinerluutigisimasaat naapertorlugit, taakku immikkut inissiisarfinniisinneqarnissaat pingaaruteqarpoq, tassani sulissutigineqassalluni innuttaasunut pitsaasumik uterteriartinneqarnissaat. Tassami inersimasut pinerlussimasut ilagitinneqarpata, inuusuttuaqqat sorpassuarnik ajortumik ilikkartinneqarsinnaapput, Aaja Chemnitz Larsen oqarpoq.
Aaja Chemnitz Larsenip radioaviisimut aamma oqaatigaa, aaqqissuussaanerusumik qanoq iliuuseqartoqarnissaa maanna pisariaqalersoq, taamaaliornikkut ulloq unnuarlu inissiisarfinnik amerlanerusunik pilersitsisoqarnissaa anguniarneqassalluni. Namminersorlutik Oqartussat kommunillu pitsaanerusumik suleqatigiinnissaat meeqqat illersuisuata aamma pitsaanerusinnaasoraa.
- Inissiisarfinnik isumannaallisakkanik, inuusuttuaqqanut 15-init 18-illu akornanni ukiulinnut naleqquttumik pilersitsisoqarnissaa naatsorsuutigaara, Meeqqat Illersuisuat, Aaja Chemnitz Larsen oqarpoq.
Pinerluuteqarsimasunut inissiisarfimmi, Aaja Chemnitz Larsenip ualeq manna paasisassarsiornera pillugu aqagu radioaviisimi tusarfigeqqissavarput.
