Meeqqat kingunerlutsitsisut katsorsaavimmi nutaami ikiorneqassapput
Meeqqat kingunerlutsitsisut katsorsarneqartarfissaannut suliaq maanna aallartinneqarpoq, nunatsinnilu kommunini siullersaassalluni. Kommuneqarfik Sermersooq nittartakkamini taama ilaatigut allaaserisaqarpoq, meeqqallu siulliit ukioq manna aggustimi iserterfigilereersinnaassagaat naatsorsuutigineqarpoq.
Meeqqat inuusuttullu Nunatsinni kannguttaatsuliorfigineqarsimasut amerlavallaarnerat pillugu, katsorsartarialinnullu katsorsaanermik neqeroorutit amigaatigineqarnerat pillugu Kommuneqarfik Sermersuup aalajangerpaa meeqqanut taakkununnga Nuummi katsorsaavimmik ammaasoqartariaqartoq.
Ilinniarluarsimasunit ikiorneqarsinnaanissaq neqeroorutaasinnaasariaqartoq oqaatigineqarpoq:
- Meeqqat taakku pillugit iliuuseqarnissarput pingaartuuvoq, kingunerlutsitsinerannilu katsorsarnissaannut akisussaaffik tigusariaqarparput, Tina Dam Rasmussen, Kommuneqarfik Sermersuumi ilaqutariinnut siunnersorti oqarpoq.
Meeqqat aqqaneq-marlunniit 18-it tikillugit ukiullit tallimat tikillugit angerlarsimaffimmi najugaqarsinnaapput, najugaqatigiiffinnilu ikittunnguanik najugaqarfigineqartuni katsorsaaneq pitsaanerpaasoq kommunip allaaseraa:
- Ilisimatusarnermi paasineqarsimavoq, meeqqat eqqornerlugaasimasut annikitsunnguanik avatangiiseqarnissaq pisariaqartikkaat, meeqqat ataasiakkaat tamakkiisumik isigisinnaasaat, Tina Dam Rasmussen oqarpoq.
Angerlarsimaffissap forstanderissaa piukkunnartoq kommunimit ujaarineqaleruttortoq kommunip nalunaarutigaa. Angerlarsimaffittaassamut atatillugu paasissutissat tunuliaqutaalu Kommuneqarfik Sermersuup nittartagaani Sermersooq.gl-imi ingerlaavartumik malinnaavigineqarsinnaapput.
