Meeqqat Isummersorfiat Maniitsumi ataatsimiilerpoq
Ullumikkut Meeqqat Isummersorfianut ilaasortat Maniitsumut tikeqaat ukiumoortumik ataatsimiikkiartorlutik. Isummersorfik 2011-mi Ilulissani meeqqat ataatsimeersuartinneqarnerani pilersinneqarsimasoq qulinik ilaasortaqarpoq, ilaallu massakkut Danmarkimi atuarnertik nangeqqikkiartornikuuaat. Taamaattumik NAKUUSA aaliangernikuuvoq ilaasortatik tallimanik ilaqqinniarlugit taamaasinikkullu sineriammiit ilaasortaqarneq siammasinnerulersillugu. Massakkut ataatsimiigiartoqassaaq Nanortalimmiit, Nuummiit, Maniitsumiit, Paamiuniit, Sisimiuniit, Qaanaamiit Kulusummiillu,Inga Dóra G. Markussen, NAKUUSA sinnerlugu taama allappoq.
Isummersorfiup ataatsimiisinneqarnerata anguniartussaavaa NAKUUSAp inuiaqatigiinnut paasissutissiinissaanut immersuinissaq, paasititsiniutissallu nunatsinni meeqqat pingasorarterutaasa oqimaattumik atugaqarnerat aallaavigisussaavaa. Nalunaarusiarineqaqqammertumi “Inuusuttuuneq nalorninartulik”, Center for Sundhedsforskning (peqqissutsimut ilisimatusarfik, red.) takuneqarsinnaavoq meerarpassuit inuusuttorpassuillu toqqissisimananngitsunik kamaaffiusuni atorluinerillu assigiinngitsuni angerlarsimaffinni peroriartortoqartoq. Taakka meeqqat inuusuttullu NAKUUSAp samminiarpai inersimasunut nukissalinnut iliuuseqarnissamut kajungissaarinikkut.
Ataatsimiinnerup inernerisassaanut pissangasut arlaqarput, taakkunanilu pissangaqataavoq Ilaqutariinnermut Inatsiseqarnermullu Naalakkersuisoq, Martha Lund Olsen, peqataaffigisinnaasimanagulu nammineq.
- Uggornarpoq ataatsimiinnerup nalaani peqataasinnaasimannginnama inuusuttut qanoq isummersuuteqarnersut tusaanngitsuussuakka. Isummersorfik sulisimapput Suli anaanamik suli ataatamik torrallallugu. Takusinnaavara angajoqqaarpassuarnut oqariartuutit apuussimasut, Martha Lund Olsen oqarpoq.
Inuiaqatigiinnut paasititsiniut “suli anaanamik suli ataatamik!” iluatsilluarsimasutut taaneqarsinnaavoq, HS-analysimmi misissuinermini takutissinnaavaa nunatsinni angajoqqaat 94 procent-it ilisimaarigaat paasititsiniut, kiisalu angajoqqaat 62 procent-iisa isumaliutigisimagaat meeqqaminnut angajoqqaariaasertik pillugu.
Meeqqat Isummersorfiat ataatsimiiginnassanngillat Maniitsumi Meeqqat Ulluat aamma malunnartinniarpaat arfininngorpat juunip aallaqqaataani. NAKUUSAp ilaatigut Kilaaseeqqap Atuarfia suleqatigaa, atuartullu ilaat titartakkaminnik saqqummiissallutik, titartagaqarsimappullu Maniitsoq siunissami qanoq isikkoqartikkusunnerlugu.
- Assut nuannaarutigaarput NAKUUSA suleqatigigatsigu Meeqqallu Ulluannut qilanaarluta, meeqqammi suliaminnik assigiinngitsunik saqqummiisussaammata, taama oqarpoq atuarfiup pisortaa Elna Heilmann.
Illoqarfimmi saqqummiinerup saniatigut Maniitsup timersortarfiani kaffillertoqassaaq tiillertoqarlunilu, kiisalu ulloq ingerlaarnermik nipiliornertalimmik naggaserneqassalluni.
