Meeqqat Isummersorfiat: Inersimasut akisussaaffeqarnerugitsi
Meeqqat inuuniarnerat pitsanngortinneqassappat,taava inersimasut akisussaaffimmik tigusisariaqalerput, taama inerniliipput Meeqqat Isummersorfiat, ukiumoortumik ulluni pingasuni ataatsimeersuarnerminni, Maniitsumi pisumi ippassarlu naammassisumi.
Meeqqat toqqinnerusumik Nunatsinni inuuneqartariaqarput, taamaattumik takutigut! Malugitigut! Meeqqat Isummersorfiat Maniitsumi ukiumoortumik ataatsimeersuareerlutik ilaatigut taama inerniliipput.
- Nunatsinni meeqqat pingajorarterutaasa ajornartorsiutigineruvaat ilaat kaallutik sininneqarpiaratillu atuariartortarneri, pissutsillu tassa tamakku Meeqqat Isummersorfianni ukioq manna sammineqartut.
NAKUUSA-mi siunnersorti, Klaus Møller taama oqarpoq.
Nunatsinni inersimasut meeqqanik sumiginnaavallaartut akisussaaffimminnillu qimarratiginnippallaartut, Meeqqat Isummersorfiat isumaqarpoq, taamaattumillu ikioq manna ataatsimeersuarnermi inersimasut akisussaaffeqarnerunissaat qulequtsiunneqarsimalluni. Taama qulequtsiinermut ilaatigut pissutaasut Klaus Møllerip ima oqaatigai.
- Meeqqat Isummersorfiata sammisaasa ilagaat, meeqqat ajornartorsiuteqartut inersimasunit isiginiarneqarpallaarneq ajorneri. Taamaattumik Isummersorfiup piumasaraa inersimasut meeqqat atugaat pillugit eqeersimaarnerusariaqalersut, Klaus Møller taama oqarpoq.
Meeqqat Isummersorfiata siorna ataatsimeersuarnerminni qulequtaraat, 'Suli anaanamik, suli ataatamik', suliniullu tamanna iluatsilluarsimasutut meeqqanit nalilerneqarpoq.
Ukioq manna ataatsimeersuarnermi qulequtsiunneqarpoq Nunatsinni inersimasut tamarmik akisussaaffimmik tigusinerusariaqartut, meerartatta atugarisaat siunissami pitsaanerulissappat.
- Nunatsinni meeqqat pingajorarterutaasa atugarliornerat eqqarsaatigalugu ataatsimiinneq ingerlanneqarpoq, Isummersoqatigiillu piumasaraat, meeraq atugarliortoq naammattoorneqarpat taassuma ikiorneqarnissaanik inersimasut pisussaaffitsik malillugu ingerlaannartumik ikiorsiisinnaanissaat.
NAKUUSAMI siunnersortsi, Kalsu Møller taama oqarpoq.
Meeqqat Isummersorfiata Maniitsumi ataatsimeersuarnerata kingorna assigiinngitsorpassuarnik Maniitsumi Kangaamiunilu meeqqanut sammisassaqartitsisoqarpoq, ilaatigut Meeqqat Oqaaseqartartuanit, MIO-mit, Peqatigiiffimmit Kalaallit Meerartaannit aamma Utoqqaat peqatigiiffiannit aaqqissuunneqartunit.
