Meeqqat iPadissatik tigusussanngorpaat
Qeqqatami Kommuniata nalunaarutigaa, Kommuneq Kujalleq peqatigalugu kommunini marluusuni illoqarfinni nunaqarfinnilu tamani WiFi-kkut attaveqaatinik pilersuinissamik IT-mik suliffeqarfimmut Inui:it-mut isumaqatigiissutinik atsuigaqarsimalluni - taamaasillunilu iPadinik suliniutip tunngavissaa inissinneqartoq, oqaatigineqarpoq.
Isumaqatigiissuteqartoqarneratigut kommunini marluusuni ukiup affaani tullerni iPadinik suliniut piviusunngortinneqarsinnaanngorpoq. Qeqqata Kommuniani juullertinnagu, Kommune Kujallermilou ukiup nutaap aallartinnerani. Kommunini marluusuni atuartut ilinniartitsisullu tamarmik taamaasillutik iPaditaartinneqassapput atuarfiullu iluani avataanilu WiFi-kkut internettersinnaassallutik.
Teknikkikkut aaqqiissutissat arlallit eqqartorneqarsimapput, borgmesterilli Hermann Berthelsenip aamma Jørgen Wæver Johansenip nalunaarutigaat Inu_it-ip illoqarfinni nunaqarfinnilu ataasiakkaani killeqanngitsumik internettertoqarsinnaaneranik neqeroorutaata ersarissunik pitsaaquteqarnerarpaat. Atuartummi, atuarfiup angerlarsimaffiullu akornaanni atuartitsinermi pilersaarutit ilinniagassallu pillugit killeqanngitsumik attaveqaqatigiittoqarsinnaalissammat.
iPadinik pisinissaq maanna suliariumannittussarsiuunneqassaaq, Kommune Kujallermilu borgmesterip pilersuinissamik soqutiginnittoqarluarnissaa naatsorsuutigaa.
- Nunatsinnimi ullut tamaasa iPadinik 3.000-inik pisisoqarneq ajorpoq, Jørgen Wæver Johansen oqarpoq.
iPadinik suliniut aningaasaateqarfiup Villumfondenip 17 mio. kr.-inik aningaasaliissuteqarneratigut piviusunngortinneqarpoq.
Isumaqatigiissullu angisooq Inu:it-mut annertuumik sunniuteqareerpoq. Suliffeqarfiup isumaqatigiissutip iluatsinnera nalliussiniarlugu Jesper Tørnkvist pisortaanertut atorfinitsissimavaa.
