Meeqqat, inuusuttut ilaqutariillu suliniuteqarnikkut nukittorsarniaraat
![](/sites/default/files/styles/image_934x467/public/article_images/the_future.jpg?itok=4xYbD8iy)
Atuagaq taaguuteqarpoq ’Pisinnaatitaaffivut - uagut inuunerput’ atuartullu assilisaat allaaserisaallu Naalagaaffiit Peqatigiit Meeqqat pillugit Isumaqatigiissutaannit tigulaakkanik ilaartorlugit suliaalluni.
- Atuagaq taaguuteqarpoq ’Pisinnaatitaaffivut - uagut inuunerput' inuunerissuusinissamik paasinnittaatsitsinnut tunngasuummat. Naalagaaffiit Peqatigiit Meeqqat pillugit Isumaqatigiissutaat naapertorlugu pisinnaatitaaffivut illersorneqarnissarpullu aamma sammivagut. - Ilaqarpugut suli meeraasunik. Aamma ilaqarpugut meeqqioreersimasunik. Tamattalu assigiissutigisarput tassaavoq toqqissisimasunik peroriartornissamik inuunermillu pitsaasumik kissaateqarnerput, atuakkap aallaqqaasiutaani taama allassimasoqarpoq.
Nanortalimmi Tasiilamilu atuarfinni atuartut Meeqqat pillugit Isumaqatigiissut pillugu atuartinneqarlutillu assiliinermik juunimi, aggustimi septembarimilu ilinniartinneqarput suleqatigiissitakkuutaarlutillu allaaserisanik annikitsunik atuakkamut suliaqartinneqarsimallutik.
Atuagaq tamanut saaffiginnittuuvoq; meeqqanut, inuusuttunut, angajoqqaanut aataakkunnut aanaakkunnullu, illoqarfinnilu nunaqarfinnilu inoqutigiinnut tamanut agguaanneqassalluni. Atuagaq suliniummi ukiuni pingasuni ingerlasussami aasarlu manna aallartinneqartumi angusarineqartut siullersaraat.
Suliniutip taaguuteqartup 'Siunissaq uagut pigaarput' siunertaa tassaavoq illoqarfinni eqqumiitsuliornikkut, kulturilerinikkut allatigullu sammisaqartitsinikkut meeqqat, inuusuttut ilaqutariillu akornanni sapiissuseqarnerulersitsinissaq, imminut tatiginerulersitsinissaq atugarissaarnerulersitsinissarlu. Suliniut atuarfinni attaveqaataasut, ilaqutariit illuutaat aammalu ornittakkat suleqatigalugit ingerlanneqarpoq.