Meeqqat inuusuttullu sammilerpaat

Kommunini sisamaasuni isumaginninnermi atuarfeqarnermilu ataatsimiititaliani siulittaasut pisortaasullu isumasioqatigiinnermi peqataassapput. Namminersorlutik Oqartussanit ilisimatuunillu aamma oqalugiartoqassaaq.

Isumasioqatigiinnissami siunertaassaaq meeqqanik inuusuttuaqqanillu isumaginninnermi suliniutaasut malittareqqinneqarnissaat - kommunit iluini susassaqartut assigiinngitsut akornanni, kommunit akornanni aamma kommunit Namminersorlutillu Oqartussat akornanni suleqatigiinnerunissaq tunaartaralugu.

KANUKOKA-p pissusissamisoortuutippaa peqatigiiffiup Red Barnet-ip Mary Fondillu suliniutaat Nunatsinni kommunit Namminersorlutillu Oqartussat sinniisaat suleqatigalugit piareersarneqarsimasoq isumasioqatigiinnermut aallarniutaasumik saqqummiutissallugu. Suliniut tassaavoq "Kammagiitta - Fri for Mobberi", qinngasaarisarnerup tamatumalu sunniutigisartagaasa akiorneqarnissaat annikillisarneqarnissaallu suliniummi siunertaalluni.