UNICEF: Meeqqat inuusuttullu nipaat Issittoq pillugu oqallinnermi tusaaneqartariaqarput

Meeqqat inuusuttullu nipaat tusaaneqarnerusariaqarput, sammisani aamma oqimaannerusuni. Sara Olsvigip ataatsimeersuarnermi Arctic Circle Assemblymi UNICEF-sinnerlugu peqataasup tamanna ilaatigut oqariartuutigaa.
UNICEF Danmarkip Kalaallit Nunaanni suliniutinut pisortaa, Sara Olsvig, meeqqat inuusuttullu Issittoq pillugu oqallinnerni peqataasinneqarnerusalernissaannut sulissuteqarusuppoq. Assi © : Unicef
Allattoq Mette Nørmark
oktobarip 18-at 2019 07:17
Nutserisoq Hanne Petersen

Naalagaaffiit assigiinngitsut qullersaat, naalakkersuisuisa siulittaasui kattuffiillu Issittup siunissaa ataatsimeersuarnermi Arctic Circle Assemblymi Islandimi illoqarfiit pingaarnersaanni Reykjavikkimi sapaatit akunnerata kangiulliup naanerani ingerlanneqartumi oqallisigiartorlugu katersuupput.

UNICEF Danmarkip Kalaallit Nunaanni suliniutinut pisortaa, Sara Olsvig, nunatsinniit peqataasut ilagaat.

Meeqqat sunniuteqarnerusinneqarlik

Sara Olsvig oqallinnernut pingasunut aggersarneqarpoq, taassumalu aamma UNICEF-ip oqallinnerni sammisat ilaat immikkut ittumik pingaartippaat: Meeqqat sunniuteqarnerulernissaat tapersertigu.

- Oqallinnermi naggueqatigiit inuit inuusuttortaat meerartaallu tapersersornissaannut Unicefiminngaanniit peqataavugut. Tassanilu soorunami oqaluttuarivagut, Unicefiminngaanniit Kalaallit Nunaanni suliniutigisagut, pingaarnertullu suliniutigisagut meeqqanik peqataatitsinermik tunngasut nassuiaateqarfigalugit. Tassanilu erseqqissarpara, meeqqat inuusuttullu nipaat toqqaannartumik aamma tusaasarnissaat qanoq pingaaruteqartiginersoq.

- Takusinnaavarput meeqqat inuusuttullu nunarsuaq tamakkerlugu aamma sammisanut oqimaannerusinnaasunut erseqqissumik isummersortalernikuusut, akuullutik, oqalliseqataallutik akerliussutsimik takutitsillutik. Tamannalu aamma nunatsinni pivoq. Silap pissusiata allanngoriartorneranut akerliussutsimik takutitsinerit pipput.

- Aamma Unicefiminngaanniit maluginiarparput Nuuk Pride Parade, tassa suiaaqatigiit aappariittarnerannut allatigullu suiaassuseqarnikkut assigiinngisitaarnermut tapersersuillutik ingerlaaqatigiitsitsinerat inuusuttunit, aamma suli 18-iliineqanngitsunit aaqqissorneqarsimasoq. Taamaammat takusinnaavarput, meeqqat inuusuttullu akoorusupput, isummersorput. Oqariartuutigaarpullu issittoq pillugu oqallinnermi politikkikkullu sammineqartut eqqarsaatigalugit meeqqat inuusuttullu nipaat ilaatinneqartariaqarpoq.

Nunatsinneersuusugut peqataajartortarnissarput pingaaruteqartoq

Nunatsinneersuusugullu Issittoq pillugu oqalliffiusussanut tassa ataatsimeersuarnernut Arctic Circle Assemblytut ittunut peqataajartortarnissarput pingaaruteqarpoq, Sara Olsvig oqarpoq.

- Issittoq pillugu ataatsimiinnerparujussuusarput. Aamma nalunngilarput Issittup Issittormiuunngitsunit sammineqarnera soqutigineqarneralu ukiuni makkunani annertoorujussuuvoq. Taamaammallu Issittumi najugaqartuusugut kalaallit, naggueqatigiit inuit allallu toqqaannartumik peqataasarnissarput suli pingaaruteqaleraluttuinnarpoq. Oqaatigerusupparalu uani Arctic Circle Assemblymi assut tulluusimaarutigigakku Kalaallit Nunaannit peqataasut pikkorilluinnarlutillu malunnaatilimmik oqalugiaqattaarmata. Minnerunngitsumillu aamma naggueqatigut inuit amerlasoorujussuullutik peqataapput.

- Tamannalu tassa pingaaruteqarluinnarpoq, pisuni, pilersaarusiornerni politikkikkut oqallinnerni Issittumi najugaqartuusugut niperput erseqqissumik tusaatittarnissaa taavalu aamma takutissallugu uagununa Issittumi najugaqartugut, uagullu eqqartorneqaratta soorunami najuutissaagut.

Sara Olsvigip saniatigut Kim Kielsen nunatsinnilu meeqqat illersuisuat ataatsimeersuarnermi aamma peqataapput.