Meeqqat inuusuttullu marlunnik ornittagartaarput
Nanu Børn aamma Kommune Kujalleq Qaqortumi meeqqat inuusuttullu ornittagassaat Neriusaaq pillugu atsioqatigiissuteqarput.
Kommune Kujallermi borgmesteri Simon Simonsen Peqatigiiffiullu Nanu Børn-ip siulittaasua Krissie Berthelsen Winberg Qaqortumi ornittagartaaq apriilimi ammartussaq pillugu ukiunut tallimanut atuuttussamik isumaqatigiissusiorput. Nunaqarfimmi Tasiusami aamma illu "Lys i Mørket” ammarneqarpoq.
Neriusaaq illoqarfiup qeqqani atuagaarniarfitoqqami ammarneqassaaq.
Meeqqanut inuusuttunullu, atuareernermik kingorna soqutiginartunik sammisaqarnissaminnik toqqissisimaffeqarnissaminnillu amigaateqartunut ammassaaq.
-Meeqqat inersimasullu akornanni pissuserissaarneq anguniarusupparput, inersimasoq maligassiuilluartoralugu. Meeqqanuinnarli ammassanngilaq, aamma ilaqutariit inooqatigiinnerminnik allanullu attaveqarnerminnik nukittorsaarusuttut tikilluaqqusaapput.
Suliniutit ineriartuutaasinnaasut arllallit ”meeqqat inuunerissuunissaanik" siunertallit aallartisarneqassasut, Krissie Winberg oqarpoq.
Ornittakkanik pilersitsineq Nanu Børnip nuna tamakkerlugu siorna aningaasanik katersuiniartitsinermit unnussiuaartitsinermillu aningaasalersorneqarpoq, inuillu ataasiakkaat suliffeqarfiillu amerlasoorpassuit ikiuiniarsimapput.
Nanu Børnip anguniarpaa Kommune Kujallermi, tamatumuuna Narsami meeqqanut inuusuttunullu aamma ornittagartaarnissaq. Sulili maannamut inissamik iluatsitsisimanngillat.
Nanu Børnip ornittagaatai sapinngisamik ullut tamaasa ullaakkut arfineq-pingasuniit unnukkut qulinut ammasassapput. Sapaatip akunnerisa naanerini unnuakkut ataatsip tungaanut ammasassapput, soorluttaaq uilluni aningaasarsiffinni sivisunerusumik ammasassasoq. Ulluni taakkunani unnuisitsisinnaaneq aamma suliniutigineqassaaq.
