Meeqqat inuusuttullu Kulusummi asiartarfittaalerput
Meeqqat inuusuttuaqqallu, kalaaliugunik nuna allamiuugunilluunniit, taamaalillutik Kulusummukarsinnaalerniassammata, kulusummiuaqqallu nunanut allanut angalanissaminnut periarfissaqalersinnaassallutik. Tamannalu piviusunngortinneqalerunarpoq. Kulusuup sapaatip akunnerani kingullermi ukiunik hornorujunngortorsiorneranut atatillugu Kommuneqarfik Sermersuumi borgmesteri, Asii Chemnitz Narup, Kommuneqarfik Sermersooq sinnerlugu Kulusummut tunissuteqarpoq, tassa aalisakkeriviusimasoq Kulusummi atuarfimmut tunniukkamiuk.
Taamatut atuisinnaanissaq Kulusummi atuarfiup ukiorpassuarni kissaatigisimavaa, aalisakkerivitoqarmi iluarsarniarpaat, lejrskolitut asiartarfimmik kulturimullu tunngassutilinnik atuartitsinermut atorneqarsinnaanngorlugu, meeqqat avataaneersut aamma tassaniissinnaanngorlugit, tunumiut piorsarsimassusaannik ilinniagaqarnissaat eqqarsaatigalugu. Kulusummi atuarfik eqqumiitsuliornermik suliniuteqartutut qangali nalunnginneqarpoq, nunaqarfiullu ukiunik hornorujunngortorsiornerani kulusummiuaqqat eqqumiitsuliaminnik saqqummersitsilluaqaat.
Illup ilaursaanneqarnissaanut Kulusummi atuarfik maanna aningaasaliisussarsiorniarpoq, Asii Chemnitz Narupilu suliniummut qilanaaqaaq.
- Suliniutip Kulusummi meeqqanut inuusuttunullu iluaqutaanissaa pingaaruteqarpoq, nunaqarfimmiunummi tamanut nuannaarutaanissaa kissaatigaarput, borgmesteri nunaqarfimmiunut oqalugiarami ilaatigut oqarpoq.
