Meeqqat inuusuttullu angajoqqaaminniikkunnaartut amerlisimapput
Kalaallit meerartaasa 6%-iisa missaat angerlarsimaffiup avataanut inissinneqareerput, tamannalu siornatigut naatsorsuisarnernit annertunerungaatsiarpoq.
Atugarissaarneq pillugu Danmarkimi ilisimatusarnermut qitiusoqarfimmit nunani avannarlerni inissiisarnermik tunngasumik misissuinerit annertuut saqqummiuteqqammerpaat. Danmark, Sverige, Norge, Finland, Island aamma Kalaallit Nunaat misissuiffigineqarput.
Kisitsisit 2006-imeersut misissuinermi tunngavigineqarput misissuinermilu meeqqat inuusuttullu angerlarsimaffiisa avataannut inissinneqartut amerlassusii kiisalu taakku amerlinersut ikileriarnersulluunniit paasiniarneqarput.
Kalaallit Nunaannut tunngasumi 1992-imi, taamani isumaginninnermut pisortaqarfiup, misissuinerata inerneri sanillersuutigineqarput. Taamanilu meeqqat ukioqanngitsuniit 17-it tikillugit ukiullit 4,3 %-ii angerlarsimaffiisa avataanut inissinneqarput maannalu misissuinerup takutippaa %-i taanna qaffattoq, tassa meeqqat inuusuttullu 6%-ii angerlarsimaffiup avataanut inissinneqartut paasineqarmat.
Qaffariaat assigiinngitsunik peqquteqartoq nalunaarusiami tikkuarneqarpoq. Inooqatigiinnikkut ajornartorsiortoqarnerulerneq tunngaviusinnaavoq, ajornartorsiutit maanna tappiffigineqarnerulersimasinnaallutik aammali inissiisarfiit amerlineqarnerinik tunngaveqarsinnaalluni.
Nalunaarusiap immikkoortuisa ilaanni nunat taaneqartut sanillersuunneqarnerini Kalaallit Nunaat Islandilu toqqaannartumik peqataatinneqanngillat. Tamanna kisitseriaatsimut tunngassuteqarpoq, tassami qeqertani allaanerusumik tunngaveqarluni kisitsisoqartarpoq.
Danmarkimi, Sverigemi, Norgemi Finlandimilu ullup aalajangersimasup nallernerani qassit angerlarsimaffiisa avataanut inissinneqarnersut pineqartarpoq, soorlu 2006-imi decemberip 31-ianni. Islandimi Kalaallit Nunaannilu ukiup ilivitsup ingerlanerani qassit inissinneqarnersut kisitsisini ersittarput. Tassa meeqqat inuusuttullu arlaleriarlutik inissiineqartut kisitsisini amerlaqutaasinnaallutik.
Taamaammat kisitsisinik sanillersuussinermi Kalaallit Nunaat Islandilu peqataatinneqanngillat, inernerili eqqarsaammersitsipput. Island nunanut allanut sanillersuunneqarnerani paasinarsivoq, tassani meeqqat inuusuttullu angerlarsimaffiup avataanut inissinneqartut nunani allanisulli amerlassuseqartut, meeqqat inuusuttullu 0,6%-imiit %-i ataaseq tikillugu angerlarsimaffiisa avataanut inissinneqarmata.
Kalaallit Nunaannili meeqqat inuusuttullu angerlarsimaffiisa avataannut inissinneqartut amerlanerpaapput, tamaani inissiisarneq Danmarkimiit arfinileriaammik qaffasinnerulluni, naak Danmark Kalaallit Nunaat tulleralugu inissiinerpaasaraluartoq.
Sverigemi meeqqat amerlanersaat angajoqqaaminni najugaqarput Sverigemimi meeqqat inuusuttullu taamaallaat 0,6%-ii angerlarsimaffiisa avataanut inissinneqarmata.
