Meeqqat Inuunerissut: Aningaasat tunissutsit kontumut tamarmik ikinngillat

Meeqqat Inuunerissut tv-kut toqqaannartumik arfininngormat katersuiniarmata ilimangisaq akimorlungu aningaasanik katersuisoqarpoq. Kulturikkut illorsuarni Katuami Sermermiunilu katersuiniarneq naammassimmat naatsorsuutit inerneraat 1 million kroni sinnerlungu.

Kisianni ukioq kingulleq katersuiniarnermi misilittakkat takutippaat siusinaarluni nuannaarnissaq mianersuuneqassasoq.

Peqatigiiffik Nanubørn ukioq kingulleq katersuiniarput. Ukioq manna katersuiniarnermi aaqqissueqataavoq siulittaasuat Krissie Winberg - nassuiaavorlu:

- Inuit sianertarput neriorsuillutillu aningaasanik tunisinissaminnut, kisianni inuit namminneq aningaasat bankikkut nakkartissavaat. Inuit kontuiniit aningaasanit nuussisinnaanngilangut.
 
Ukioq kingullermi katersuiniarnermi 1 million kronit sinnerlungit katersorneqarput, kisianni 150.000 kronit missaat Nanubørnip kontuanut ikinngisaannarput, inuit amerlasuut neriorsuinertik naapertorlungu aningaasat bankikkut ikinngisaannaramikkit.

Taamaammat inuit qanoq iliussasut Meeqqat Inuunerissut siulittaasuata Line Frederiksenip kaammattorpai:

- Inuit netbankillit kaammattorusuppakka netbankikkut tunissutitsit ikisinnaangaat, netbankeqanngitsut Grønlandsbankikkut, Bank Nordik Pilersuisukkulluunniit tunissutitsit kontutsinnut ikisinnaavaat.

Meeqqat Inuunerissut Grønlandsbankimi kontorivaat 6471-2222229. Aningaasat tunissutsit novembarip 25-ata tungaanut akileraaruteqanngillat. Katersuiniarnermi Meeqqat Inuunerissut naatsorsuutitsik saqqummiussavaat decembarip aallartinnerani.