Meeqqat inuunerinnerunissaat anguniarpaat

Peqatigiiffik Meeqqat inuunerissut sapaatit akunneri 4547 Paamiuni aaqqissuussiniarput taaguuserlugu Kuseriarnerup Siaruarneratut. Tassani meeqqat pitsaasumik imaqarluartumillu inuuneqarnissamut pisinnaatitaaffeqarnerat sammineqassaaq. Inuttaasunik ataatsimiisitsisoqassaaq aammalu Taqqissuuserisut innuttaasunut tamanut pikkorissartitsiniarput novemberip 17-at 18-allu.
Allattoq Peter Troelsen, Noah Mølgaard
novembarip 06-at 2012 06:17

TAQQISSUUSERISUT tassaapput nammineq piumassutsimik sulisut taakkulu nuna tamakkerlugu immikkoortoqalernissaat meeqqat inuunerissut MIBB-ip anguniarpaa. Suliniarnerup siammarnera illoqarfinni nunaqarfinnilu meeqqanut iluaqutissanngortinniarneqarpoq. Pikkorissaasuupput tarnip pissusaanik ilisimasallit Naja Lyberth aamma Inuk Borup Egede taakkulu meeqqat pisinnaatitaaffii pillugit FNip nalunaarutaa aallaaviginiarpaat.

- Anguniarneqarpoq inuit nukissaqarluartut nammineq piumassutsimik suliniarnermi peqataalersinnissaat taamalu meeqqat kinguaassiutitigut atornerlunneqarsimatillugit iliuuseqarsinnaalerlutik. Taamatuttaaq pisoqartassaaq meeqqat pisinnaatitaaffii sumiginneqarneqarsimatillugit. Tassami pisortat qanoq iliuuseqarnissaat utaqqiinnarsinnaanngilarput. Taamaaasiunngikkutta siunissatta meeqqat pitsaasumik atugaqarnissaat qulakkiinngitsuussavarput, MIBB-mi suliniummik aqutsisoq Nivé Heilmann oqarpoq.

MIBB'p suliniutaanut atatillugu containerit pingasut angalaartinneqarput taakkulu nunat tamakkerlugu siorna katersuiniarneq "katersuiniarneq" aqqutigalugu aningaasalersorneqarput. Containerit taakku illoqarfinnut qulinut angalaarunneqarput taakkulu ukiut pingasut ingerlaneranni MIBB-mit tikeraarneqarnissaat siunertaavoq.

- Sapaatit akunneri marluk Paamiuniissaagut illoqarfimminniitsinnilu innuttaasut paasiniaaffigineqassapput meeqqat inuusuttullu inuunerat qanoq isilluta pitsanngortissinnaaneripput. Tamatuma kingorna attaveqatigiinnerit namminerlu piumassutsimik suliniarnerit aallartissapput taakkulu MIBB'p suliai aamma meeqqat pillugit FNip nalunaarutaa pillugu ilisimasassaqalersimassapput. Illoqarfinni allani tikitassatsinni taama aamma pisoqartassaaq. Tulliullugit orninneqartussat tassaapput Qaqortoq aamma Ilulissat, Nivè Heilmann KNR.gl-mut oqarpoq.

TAQQISSUUSERISUT pikkorissartitsinissaaannut soqutiginnittut saaffiginnissinnaapput uunga: mibb@mibb.gl imaluunnit uunga sms-erluni 53 97 13.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq