Meeqqat illuinik pilersitsisoqarnissaa naalakkersuisut siunniuppaat

- Aaqqiigasuarnerit unitsillugit, ilisimalikkat aallaavigalugit ingerlalerpugut, Isumaginninnermut naalakkersuisoq Maliina Abelsen oqarpoq.

Meeqqat inuusuttullu atugarliortut sullinneqarnerannut, immikkut ittumik suliniuteqarnermut periusissiap piviusunngortinniarnissaa 25 millionit koruuninik naleqassangatinneqarpoq.

- Meeqqat illussaat meeqqat kinguaassiutitigut atornerlunneqarsimasut sullinneqarnissaannut aallaaviussapput, Maliina Abelsen oqarpoq.

- Meeraq kinguaassiutitigut atornerlunneqarsimasoq, illumik ikiuinasuarfiusinnaasumik, ataqatigiissaarisumillu meeqqamut naleqquttumik ullumikkut ornitassaqanngilaq. Maliina Abelsen oqarpoq.

Meeqqat illuanni sulisut ilinniarluarsimasuussapput immikkut ilisimasallit. Nunatsinnili naammattunik ilinniarluarsimasunik nassaarsinnaanerlutik?

- Tamanna ilimanaateqanngilluinnarpoq, inulerinerup iluani sulisunik ilinniarsimasunik amigaateqaqaagut, taamaammat aallaqqaammut meeqqat illua ataaseq kisiat ammarniarallarparput, siunissamilu sulisussanik pikkorissaanikkut ilinniartitsinikkullu siunertaq angujartuaarumaarparput.

Ataatsikkut meeqqat illuinik arlalinnik ammaagaluarutta sulisussaqartinnginnatsigit.

Meeqqat inuusuttullu sullinneqarneranni aaqqiinasuartarneq atorunnaarlugu ilisimasat aallaaviulissapput.

-Siornatigut suliniuterpassuit aningaasarpassuarnik atuiffiusut takusareerpagut, ukiualunnguillu qaangiukkaangata ajornartorsiutit taakkorpiaat aataalloorlutik uteqqittarput, taamaammat nalilersueqqissaarneq, ilisimasanillu atuineq siunertaraarput, qulakkeerniarlugu allannguinissaq, aningaasanik asuli atuiffiunngittoq.

Maliina Abelsen oqarpoq.

Meeqqat illussaat illu pioreersoq nutarterneqarlunilu piareersarneqassaaq ukiamut atulersussanngorlugu. Sumerpiarlu inissisimanersoq Maliina Abelsen-ip suli oqaatigisinnaanngilaa.