Meeqqat illersuisussaat tusarniaassutigineqarpoq
Meeqqat Illersuisuat oqartussanut, suliniaqatigiiffinnut aamma meeqqanut inuusuttuaqqanullu sullissisuinut Siunnersortitut inissisimassaaq.
Meeqqat Illersuisuat innuttaasut nukarlersaasa soqutigisaannik pisariaqartitaannillu, inatsisitigut ikiuuttassaaq. Tassami inuiaqatigiinni oqartussanut, suliniaqatigiiffinnut suliffeqarfinnullu ajorsartutut meeqqat inissittoortarmata.
Inuiaqatigiinni meeqqat sanngiitsutut illersortariaqartutullu inissisimapput, taamaattumillu soqutigisaasa illersorneqarnissaat pisariaqarluni.
Naalagaaffiit Peqatigiit Meeqqat Pisinnaatitaaffii pillugit Isumaqatigiissutaanni aalajangersakkat, sulili Kalaallit Nunaanniit atsiorneqanngitsut, aallaavigalugit Meeqqat Illersuisuat aamma Meeqqat pillugit Siunnersuisoqatigiit pilersinneqassapput.
Meeqqat Illersuisuata meeqqat pisinnaatitaaffiinik suliaqarnissamini ingerlatsiviit akisussaaffiinik tigusaqarsinnaanngitsoq, inatsisissatut siunnersuummi oqaaseqaatini naqissuserneqarpoq. Akissussaaffiulli allatut inissinneqarsinnaaneranut Meeqqat Illersuisuat peqataasinnaavoq. Tassaavorlu aaqqissuussinermi nutaami isumagineqartoq. Aammattaaq Meeqqat Illersuisuata allaffissornikkut oqartussat, naalakkersuinikkut oqartussat aamma eqqartuussiviit aalajangersagaat pillugit oqaaseqarsinnaavoq.
Meeqqat Illersuisuat ukiut pingasukkaarlugit qinerneqartassaaq, qinigaaffinnilu marlunni tassa katillugit ukiuni arfinilinni atuussinnaalluni. Nutaaliornerummat, meeqqanullu inooqatigiinnikkut, kulturikkut upperisaqarnikkullu assigiinngitsut akimorlugit suliniutillu nutaat Meeqqat Illersuisuannut pisinnaasaammata pingaarutillit, attaveqarnissami pisariaqarput. Meeqqat Illersuisuat inatsisilerituujusariaqanngimmat aamma naqissuserneqarpoq.
Meeqqat Illersuisuat aammattaaq Meeqqat pillugit siunnersuisoqatigiit ilaasortaannut arfineq marluusunut siulittaasuuvoq. Aamma taakku ukiut pingasukkaarlugit qinerneqartassapput, qinigaaffinnilu marlunni atuussinnaatitaassallutik. Pingasut Naalakkersuisunit toqqarneqartassapput sinnerilu pingasut suliniaqatigiiffinnit peqatigiifinnillu toqqarneqartassallutik.
Meeqqat Illersuisoqalernissaat nunatta karsianut ukiumut 3,3 millioninik naleqassangatinneqarpoq. Inatsisartut ukiaanerani ataatsimiinnissaanni meeqqat pillugit inatsisissaq nutaaq tapersersorneqarluarluni akuersissutigineqassangatinneqarpoq.
