Meeqqat Illersuisuat Qeqertalimmut tikeraartussanngortoq

Meeqqat Illersuisuat illoqarfinnut nunaqarfinnullu arfineq-marlunnut meeqqat atugarisaat pillugit meeqqanik inersimasunillu oqaloqateqariartorluni oktoberip naanerani angalassaaq.
Meeqqat Illersuisuat, Aviâja Egede Lynge tassanilu illoqarfiit nunaqarfiillu arfineq-marluk tikeraassallugit. Assi © : KNR
oktobarip 15-at 2019 09:33

Meeqqat illersuisuata, Aviâja Egede Lyngep angajoqqaat, suliaqartut, oqartussaasut politikerillu meeqqat atugarisaat pillugit aamma oqaloqatigissavai.

MIO Qeqertalimmeereeruni - meeqqat Illersuisuata meeqqat, inuusuttut inersimasullu illoqarfinni nunaqarfinnilu 40-ni meeqqat atugarisaat pillugit oqaloqatigisareersimassavai.

- Angalanermi meeqqat inersimasullu periarfissarissavaat MIO-mit oqaloqateqarnissaq, piumagunik kinaassutsimik isertuussisinnaallutik. Tamatuma saniatigut MIO-p atuartut pisinnaatitaaffiit pillugit sammisaqartissavai, meeqqat illersuisuat tusagassiutinut taama nalunaaruteqarpoq.

Angalaneq oktoberip ulluisa 19-annit novembarip ulluisa arfernata tungaanut ingerlanneqassaaq.

Nunatsinni meeqqat atugarisaat pitsaanngitsut pillugit nalunaarusiat arlallit MIO-mit saqqummiunneqartareerput.

Meeqqat illersuisuata angalanerminut atatillugu meeqqat inuusuttullu atugarisaat pillugit oqaloqatigisarpai - angalanermiillu paasisat aallavigalugit nalunaarusiorneqartarlutik.

Meeqqat Illersuisuata MIO-llu naalagaaffiit peqatigiit meqqanut pisinnaatitaaffiit nunatsinni malinneqarnersut nalilersussallugu inatsisitigut pisussaaffigisaannut ilaapput.