Meeqqat illersuisuat imigassamik matusigallarneq pillugu: Eqqissiallaataavoq
- Naalakkersuisut siulittaasuata aalajangernera isumaqatigaara, meeqqat illersuisuat Aviâja Egede Lynge Nuummi, Kapisilinni Qeqertarsuatsiaanilu imigissamik matusigallarneq pillugu oqarpoq.
Nualluut coronavirus siammatsaaliorniarlugu imigassanik aalakoornartortalinnik tuniniaaneq sassaalliuteqartarnerlu arfininngornermit marsip ulluisa 28-annit matuneqarput.
AAMMA ATUARUK Naalakkersuisut indfører alkoholforbud i Nuuk, Kapisillit og Qeqertarsuatsiaat
- Taamatut aalajangerninni qitiutitakka tassaapput meeqqat, taakkumi toqqissillutik angerlarsimasinnaasariaqarput, Naalakkersuisut siulittaasuat Kim Kielsen tusagassiutinut nalunaarummini oqarpoq.
Meeqqat qitiutinneqarneri meeqqat illersuisuata taperserpaa.
Illersorneqarnerat killeqarpoq
- Meeqqat imaaliornikkut illersorneqarput kisiannilu aappaatigut ukua pinngitsuuisinnaanerup nassatai eqqarsaatigissagutsigit aamma illersorneqarnerat killeqarpoq, Aviâja Egede Lynge oqarpoq.
Angerlarsimaffinni perulluliornerit festernerillu arfininngornerup unnuaani amerlasimasut, politimesterip Bjørn Tegner Bayip oqaatigaa. Perulluliornerit arfinillit nalunaarutigineqarput - tassa nualluutip takkutinnginnerani perulluliornerit assigikannerlugit nalunaaruteqartoqarluni.
Piffissami matumani nualluut siammatsaaliorniarlugu inunnit qulinit amerlanerusut ataatsimooqqusaanngillat - inuillu imminnut 2 meterinik ungasitsigisassasut innersuussutigineqarpoq.
AAMMA ATUARUK Unicef: Imigassamik matusigallarneq ajunngilaq - eqqissiviilliortoqarsinnaavorli
Imigisamik matusineq kinguneqarnerlussinnasoq, meeqqat illersuisuat oqarpoq.
- Ajoqutigisinnaasai uaniipput soorunami pinngitsuuisinnaanerup nassatai aamma saqqummertussaammata. Tassa tarnikkut timikkullu persuttaanerit aamma kingunerisutut ajoraluartumik saqqummertarmata.
Ikiorsiiffissat atorluarlugit
Taamaattumik meeqqanut kajumissaaruteqarpoq:
- Kaammattuutigerusuppara taamatut pisoqartillugu ikiorsiiffissat assigiinngitsut ersarissarneqarsimasut atorneqaqqullugit. Meeqqanut assersuutigalugu una SMS 1899 saaffigineqarsinnaavoq, Aviâja Egede Lynge oqarpoq.
Oqarasuaatikkut siunnersuisarfik Tusaannga 80 11 80-mut attavigineqarsinnaavoq - imaluunniit 18 99 - mut allattoqarsinnaavoq.
Imigassamik matusigallarneq apriilip 15-iata tungaanut atuuppoq.