Meeqqat ikiorserneqarsinnaanerannik isumassarsiornermi atuagassiaq saqqummerpoq
Meeqqat mianerisassaat pillugit aamma inersimasunit meeqqat ikiorserneqarsinnaanerannik isumassarsiornermi, atuagassiaq suliarineqarpoq.
Nunatsinni meerarpassuaqarpoq ulluinnarni toqqissisimanngitsumik inuuneqartunik, ilaatigut angajoqqaanit qanilaassusermik tunineqarneq ajornermik pissuteqarsinnaasumik.
Angerlarsimaffinni imigassamik ajornartorsiuteqartoqarsinnaavoq aamma angajoqqaat akornanni persuttaanneq meeqqanit misigineqarsinnaasarluni. Tamakkuinnaanngillalli aamma ilaqutariit aningaasakilliorsinnaapput, ilaqautaasut ilaat napparsimalersimasinnaalluni, angajoqqaat avinneri meeqqanut annertuumik isumakulutsitsisinnaalluni aamma qinngasaartittarneq misigineqarsinnaasarluni.
Meeqqat qanoq inuuneri pissutsinik qulaani taaneqartunit sunnerneqarsinnaasarput, angajoqqaanit tamanna iluamik paasineqarsinnaanngippat. Tassa ilaatigut tamakku pillugit atuagassiami isumassarsiortoqarsinnaalluni. NAKUUSA tusagassiutinut nalunaarummi taama allappoq.
Maanna inersimasorpassuaqarpoq imminnut aperisunik: 'Soormitaavaana taamani misigisakka ajortut aqqusaarakkit qanoq iliuuseqartoqanngitsoq aamma inersimasunit ikiorneqanngitsunga?'
Tassa ilaatigut tamakku apeqqutit qulaajarniarlugit aamma ullutsinni meeqqat maanna inersimasut misigisimasaannik misigisaqannginnissaat anguniarlugu, NAKUUSA atuagassiamik saqqummersitsivoq.
NAKUUSA-p suliniutaa tamanna 2011-mi aallartippoq ingerlanneqassallunilu ukioq 2015-p tungaanut. Suliniut tamanna aningaasalersugaavoq Bikuben-ip aningaasaateqarfianit aamma Augustinus-ip aningaasaateqarfianit.
