Meeqqat autismeqartut innarluutilinnut sapaatit-akunneritinneqartumi qitiutinneqassapput

Isumaginninnermut Naalakkersuisup, Sara Olsvigip marsimi ukioq manna autisme pillugu ataatsimeersuarnerup malitsigisaatut sapaatip akunnera 41 ”meeqqat autismeqartut”-nik sammisaqarfissanngortippaa.

- Inuup sananeqaataanik allanngortoqartillugu qarasaat allaniit allaanerusumik sulilersarpoq taamaalillunilu autisme pilersarluni, Olsvig nassuiaavoq.

Autistertut tamarmik assigiinngiiaartunik ajornartorsiuteqartarput, ilaatigut attaveqaqatiittarneq, inooqataanermut akuunissaq ajornartorsiutigineqartarluni.

Autismertumut siusinaartumik iliuuseqarnikkut autismertup taassumalu ilaqutai avatangiisaalu oqilisaaffigineqarsinnaapput.

Taamaammat naalakkersuisoqarfiup isumaginninnermullu aqutsisoqarfiup nunatsinni soqutigisaqaqatigit peqatigiiffiit inuillu tamakkuninnga suliaqartartut sapaatip akunnerani 41-mi innuttaasut autismeqartut atugaannik ajornartorsiutigisinnaasaannillu sammisaqaqqullugit kaammattorpai.

Innarluutillit sapaatip akunneqartinneqarnissaanni qulequttap pineqartup sammineqarnissaanut, suliaqartitsinissanut aaqqissuussinissanullu Isumaginninnermut Aqutsisoqarfimmut tapiissutinik qinnuteqarnissamut suli periarfissaqarpoq.

Qinnuteqaat Isumaginninnermut Aqutsisoqarfimmi kingusinnerpaamik 4. oktober 2017 tiguneqareersimassaaq.))

Nassiussiffigineqarsinnaasullu aajuku:  iass@nanoq.gl imaluunniit Socialstyrelsen, Postboks 260, 3900 Nuuk, nalunaaqutserlugu “Sap. Ak. 41”.