Meeqqat atuarfii pillugit nutaamik inatsiseqalissasoq
Inatsisissatullu siunnersuummi immikkoortut pingaarnerit qulit qimerlualaaraanni ilaatigut takuneqarsinnaavoq nunaqarfinni atuarfiit tamarmik aaqqissuussaanikkut illoqarfimmi atuarfimmut ataatsimut atassuteqalissasut.
Nunaqarfinni atuarfiit tamarmik aaqqissuussaanikkut illoqarfimmi atuarfimmut ataatsimut atassuteqalerneranni nunaqarfinni atuarfinni perorsaanikkut aaqqissuussaanikkullu illoqarfimmi aqutsisut akisussaasuussapput.
Angalaqatigiittartunik pilersitsinissaq takorloorneqarpoq, ilinniartitsisut atuarfinnut ilinniartitsisunik amigaateqarfiusunut tikeraarsinnaanissaat siunniunneqarluni.
Meeqqat atuarfiisa tamarmik atuartut mappersagaannik nutarterisinnaanissaat aamma siunnersuutigineqarpoq.
Akileraartarnermut Atugarissaarnermullu Suleqatigiissitaliap atuartut mappersagaat aaqqissuussinermi sakkutullu atorneqarsinnaanissaat siunnersuutigaat, meeqqat inuttut atugarliortut ingerlaavartumik suliniutigineqarfigineqarneranni annertunerusumik tapersiissutaanissaat takorloorneqarluni.
Akileraartarnermut Atugarissaarnermullu Isumalioqatigiissitap inassuteqaataa malillugu naalakkersuisut aamma siunnersuutigaat atuarfiit tamarmik pitsannguutit pingaarnerutillugit pitsaassutsimik nalunaarusiamik saqqummiisalissasut, soorlu aamma killiffinni misilitsinnermi, inaarutaasumik misilitsinnermi angusat, klassini atuartut amerlassusaat, piffissaq atuartitsiviusoq, napparsimanerit, taartaasartut tiimii allallu matumani nassuiarneqartassallutik.
Pitsaassuseq pillugu nalunaarusiat taakku kommunalbestyrelsinut oktobarip aallaqqaataani nassiunneqartarnissaat siunnersuutigineqarpoq.
Inerisaavimmi ingerlatanik tulleriinnilersuineq allanngortinneqassasoq aamma siunnersuutigineqarpoq, soorlu Akileraartarnermut Atugarissaarnermullu Ismalioqatigiissitaq taama inassuteqartoq.
Inerisaavik taamalilluni immikkoortuni arlalinni sunniutinik annertunerusumik uuttuisalissaaq.
Ilinniartitsinermut periussaq pillugu Naalakkersuisut nalunaarusiaat Meeqqat atuarfiat pillugu inatsisissatut siunnersuummi ilaatigut tunuliaqutaavoq.
