Professori: Meeqqat atuarfiat pitsaasoq namminiilivinnissamut aalajangiisuussaaq

Nunatsinni politikerit Savalimmiuni ineriartornermit isumassarsiortariaqartut Berthelsen isumaqarpoq. Savalimmiummi inuttamik ilinniartinnissaanut iluatsitsinerujussuupput, taamaalillutillu sulisunik tikisitanik nunatsinnit pisariaqartitsinnginnerullutik.

- Ilinniartitsinerup qaffasissusaa, nunap inuttussusiaanngitsoq, aalajangiisuusoq, Savalimmiunit, Kalaallit Nunaannit ikinnerulaartunik inulik, takutinneqarpoq. Inukissusermik tunngavilersorneq akornusersuivoq eqqunngitsuullunilu, professor Rasmus Gjedssø Bertelsen Altinget.dk-mi oqallissaarutimini allappoq.

AAMMA ATUARUK Ilinniagaqassutsip qaffassarnerata siuariartorneq sukkanerulersissavaa

Soorlu Savalimmiunisut Islandimisullu nammineerluta oqaatsigut atorlugit ingerlatsilersinnaaniassagatta, nunatsinni amerlanerit ilinniakkamik naammassisaqarnissaannik qulakkeerinninneq aqqutissaasoq professori isumaqarpoq.

- Atuarfik kalaallisut oqaluffiusoq pitsaasoq, kalaallit inuusuttut Kalaallit Nunaanni nunanilu allani ilinniaqqilersinnaanissaannut piareersaataasussaq alloriarnerni siulliuvoq. (...) Taava angerlariarlutik namminerisamik oqaatsit atorlugit inuiaqatigiinnik ingerlatsillutik, professori allappoq. Aningaasaqarnikkut namminersulernissaq namminiilivinnissatsinnut suliassani tulliusariaqartoq, professori isumaqarpoq.

AAMMA ATUARUK Ilinniarneq imminut akilersinnaasoq

Nunatsinni inuit 20-nik ukioqalereertut 40 procentii meeqqat atuarfiata saniatigut ilinniakkamik naammassisaqarsimasut, Naatsorsueqqissaartafiup kisitsisaataasa takutippaat. Savalimmiuni 70 procentiupput.

Rasmus Gjedssø Berthelsen nunatsinni ilinniartitaanermik pitsanngorsaanissamik kajumissaaruteqartuni kisimiinngilaq. Aningaasaqarnermut siunnersuisoqatigiit siulittaasuat, Torben M. Andersen nunatsinni ilinniartitaanerup pitsanngorsarneqarnissaanik politikerinut arlaleriarluni kajumissaaruteqartarpoq.

Aningaasaqarnermut siunnersuisoqatigiit naapertorlugit, ilinniartitaanermik pitsanngorsaaneq aningaasaqarnikkut namminersulernermut aqqutissiuissaaq.