Meeqqat ataatsimeersuartinneqarnerminni kissaataat: Meeqqat atuarfii pitsaanerusariaqarput
Naja Nuka Bjerge Kristiansen, ataatsimeersuarnermi peqataasoq, ataatsimeersuarnermi pissarsiaqarluarsimanerarpoq:
- Nuanneqaaq, pissarsiaqarnarpoq. Soorlu pisinnaatitaaffiit suunersut, akisussaaffit, assigisaallu, Naja Nuka Bjerge Kristiansen, Qaqortumeersoq, meeqqat Ilulissani ataatsimeersuartinneqarneranni peqataasoq oqarpoq.
Qeqqata, Qaasuitsullu Kommuniani, Kommuneqarfik Sermersuumi, Kommune Kujallermilu Meeqqat Isummersorfianni ilaasortat, meeqqat atuarfiata pitsaanerulersinneqarnissaa pillugu assigiinngitsunik 16-inik siunnersuuteqarput, soorlu angajoqqaat meeqqami atuarnerannik soqutiginninnerunissaat, assersuutigalugu ilinniakkerinermut tunngasunut assigisaannullu.
Atuartitsinerup pitsanngorsarneqarnissaanut kissaateqarput
Atuartut ilinniartitsisoq peqatigalugu qaammammut minnerpaamik marloriarlutik qinngasaaruttarneq pillugu oqaloqatiginnittassasut, meeqqallu namminneq oqaatigisaattut: Ilinniartitsisut soqutiginanngitsunik suliaqartitsisarput, pikkorissarneqartariaqarlutillu:
- Soorlu, suliakkiissutaat soqutiginarnerit, ilinniartitsisullu nuannaarnerullutik suliaqarnissaat kissaatigaarput, Naja Nuka Bjerge Kristiansen oqarpoq.
Meeqqat Isummersorfianni ilaasortat ilanngullugu erseqqissaaatigaat ilinniartitsisut amerlanerit suliatik nuannaralugillu soqutigigaat.
Naja Nuka Bjerge Kristiansenillu meeqqat Ilulissani ataatsimeersuartinneqarneranni peqataasimanini nuannaarutigaa:
- Uannut isumaqaqaaq, soorlu sunniuteqaqataaniarsarigaanni piumassuseqartariaqartarami, taava tamakku ilinniarlugit ilikkarpakka, Naja Nuka Bjerge Kristiansen, Qaqortumeersoq, taama oqarpoq.
